میونخ۔ 20 فروری (اے پی پی) سعودی عرب نا وزیر خارجہ عادل الجبیر امریکی صدر ڈونلڈ ٹرمپ ئِ رونالڈریگن اٹ تشبیہ ترسا پارینے کہ ٹرمپ انا کماشی نا دور اومیت بڈ ثابت مننگ کیک۔ سعودی میڈیا نا رداٹ دا ہیت ئِ او میونخ سیکورٹی کانفرنس نا وخت آ اسہ دوداسے آن تران کرسا پارے۔ اوپارے کہ ہراتم 80 نا دہائی ٹی رونالڈریگن امریکہ نا صدر گچین مس تو ہمووخت آ ہم امریکی صدارتی عہدہ نا بابت گڑتی نا درشانی مون آ بسوسس ولے گڈ سراٹی نن خنان کہ ریگن نا دور اٹی امریکہ و مسکوہی سوویت یونین نا نیام اٹ تعلقداری تیٹی گچینی بس و بالاخر سرد جنگ انا خاتمہ ممکن مس۔ اوڈونلڈ ٹرمپ اکن نیک است خواہی تا درشانی ئِ کرے پارے کہ خلیج کن ٹرمپ انتظامیہ و ننا اولیت آک اسہ وڑ ئُ ، ٹرمپ داعش ئِ چٹفنگ خوائک ، نن ہم ہنداخوانہ ، او ایران نادنگ آن تجاوز کننگ نا کوشست آتا برخلاف ئِ و ہند اننا کوشست ئِ۔ ٹرمپ روایتی خلیفہ غاتون کاریم کننگ خوائک و دا ننا ہم خواہش ئِ۔ اوایران آ سخت تنقید کرے و اودے دہشت گردی نا مخ تفی کروک آ ریاست گوندا۔
