پاکستان 2030 ءَ تاں ہیپاٹائٹس سی ءَ چہ پاکیں ملک ءِ کنگی اِنت، مصطفیٰ کمال

اسلام آباد۔28جولائی  (اے پی پی): وفاقی جان سلامتی ءِ وزیر مصطفیٰ کمال ءَ گوشت کہ تاں انوگ ءَ ایوک ءَ 21ہزار شہری آنی اسکریننگ کنگ بوتگ وھدیکہ حکومت ھر یک شہری ءِ اسکریننگ ءِ سر ءَ 7ہزار کلدار ھرچ کنگ ءَ اِنت۔ اے جیڈھ آنی درشان آئی ءَ جھان ءِ آبادی ءِ روچ ءِ درگت ءَ برجم داشتگیں سیمینار ءَ گوں گشتانک کنان ءَ کت۔ آئی ءَ شہری آں چہ حکومت ءِ گوما کمک کنگ ءِ اپیل کتگ تانکہ اسکریننگ ءِ عمل ءَ را گیش مھکم کنگ بہ بیت۔ آئی ءَ گوشت کہ حکومت ءِ مول ءُ مراد 2030 ءَ تاں پاکستان ءَ را ہیپاٹائٹس سی ءَ چہ پاکیں ملک جوڑ کنگ اِنت۔وفاقی جان سلامتی ءِ وزیر ءَ گوشت کہ ہیپاٹائٹس سی ءِ نادراھی ءِ آماچیں شہری ءِ علاج ءِ اولی کورس 34ہزار کلدار ھرچ بیت، ایشی ءَ را حکومت برداشت کنت۔ ہر نادراہ ءَ را دو کورس ءِ علاج مفت ءَ دیگ بیت کہ ایشی ءِ کلیں ھرچ 68 ہزار کلدار بیت۔ مصطفیٰ کمال ءَ گوشت کہ جان سلامتی ءِ تہ ءَ یک ڈالر ءِ سرمایہ کاری ءَ چہ معیشت ءَ را ھشت ڈالر ءِ نپ رس ایت، پمیشکا جان سلامتی ءِ نظام ءَ را مھکم کنگ المی اِنت۔ آئی ءَ گوشت کہ مارا وت وتی جان سلامتی ءِ نظام ءَ را گہتر کنگی اِنت، چیاکہ اے جیڈھ آنی گیواری ءِ واستہ ھچ فرشتہ نہ کئیت۔ وفاقی جان سلامتی ءِ وزیر ءَ گیش گوشت کہ حکومت یک انچیں کانود ءِ دیم ءَ آرگ ءَ اِنت کہ ایشی ءِ رد ءَ ھما مردم کہ آھانی ھیپاٹائٹس سی ءِ اسکریننگ سرجم بوتگ آھاں ھم ایچ آئی وی ءِ ٹیسٹ کنگ لوٹ ایت۔ اے کانود 12 سال ءُ گیش ءِ مردمانی سرا کارمرز بیت۔ آئی ءَ بائیوٹیکنالوجیز ءِ بے اثری ءِ سر ءَ جیڈھ ءِ درشانی کنان ءَ گوشت کہ ھما نادراھ کہ سئے روچ ءِ تہ ءَ وش بوھگ ءَ اتنت آ نوں ھشت روچ ءِ وش بوھگ ءَ انت کہ ایشی ءَ چہ ایچ آئی وی مائیکرو بائسائڈ مزاحمت ءِ گیش بوھوکیں جیڈھ ءِ درشانی کنگ بیت۔