حکومت ءِ اے سال ءَ مون سون ءِ ھور ءُ گمان بوتگیں  زمین چنڈ ءِ گوں گر ءُ چیل بوھگ ءِ پسو جوان بوتگ، زوتیں ھال ءِ نظام ءَ جانی ءُ مال ءِ تاوان ءَ را مزنیں کساسے ءَ کم کتگ، وفاقی وزیر اطلاعات عطا اللہ تارڑ

اسلام آباد۔28جولائی  (اے پی پی): وفاقی وزیر برائے اطلاعات ءُ نشریات عطا اللہ تارڑ ءَ گوشت کہ اے سال ءَ مون سون ءِ ھور ءُ گمان بوتگیں  زمین چنڈ ءِ ھلاپ ءَ حکومت ءِ پسو جوان بوتگ، NDMA ءِ وھد ءِ سر ءَ گامگیج، نوکیں ٹیکنالوجی ءُ زوتیں ھال ءِ نظام ءَ چہ جانی ءُ مال ءِ تاوان ءَ را مزنیں کساسے ءَ کمی اتکگ۔ کلیں سرکاری ادارگ آنی ھمگرنچیں رھبند، زوتیں ھال ءُ اھوال ءُ وھد ءِ سر ءَ روننگ،   اے ھیالانی درشانی آئی ءَ نیشنل ڈیزاسٹر  مینجمنٹ اتھارٹی ءِ تر ءُ تاب ءِ ساھت ءَ کت۔ آئی ءِ گوما وفاقی وزیر احسن اقبال، رانا تنویر حسین، مصدق ملک، ھاسیں کمکار  میاں محمد معین وٹو  ءُ سینیٹر  اورنگزیب ھم ھوار اتنت۔ وفاقی وزیر ءِ اھوالکاری ءَ گوشت کہ اے سال ءَ مون سون ءِ ھور آنی سر ءَ حکومت ءِ پسو سک باز جوانیں بوتگ، گوستگیں سال ءِ جاور ھال آنی تہ ءَ چہ بازیں چیزے دربرگ بوتگ ءُ اے تجربگ ءِ رژنائی ءَ جوانیں حکمت عملی ءِ رد ءَ زورگ بوتگ۔ آئی ءَ این ڈی ایم اے ءِ چیئرمین لیفٹیننٹ جنرل انعم حد ءَ را شگر ءُ منت درشان کت ءُ گوشت کہ این ڈی ایم اے ءَ مون سون ءِ ھور ءُ گمان بوتگیں  سیلاب ءِ ھلاپ ءَ جوانیں گامگیج چست کتگ۔ وفاقی وزیر ءَ گوشت کہ مزن وزیر شہباز شریف ءَ مون سون ءُ سیلاب ءِ جاور ھال ءِ ھوالگ ءَ وھد ءِ سر ءَ گند ءُ نند کتگ، ایشی ءِ تہ ءَ این ڈی ایم اے ءِ کارندہ، وفاقی کابینہ ءِ باسک، سیادی داروکیں صوبائی حکومت، گلگت بلتستان ءُ آزاد کشمیر ءِ نمائندگ آں بھر زرتگ۔ عطا اللہ تارڑ ءَ گوشت کہ این ڈی ایم اے ءَ گوں درستیں سیادی داروکیں محکمہ ءُ صوبائی حکومت آنی کمک ءَ زوتیں ھال ءِ نظام ءِ سر ءَ کار کتگ ءُ بوت کنوکیں ھترہ آنی بابت ءَ الس ءَ را وھد ءِ سر ءَ سرپدی داتگ۔ آئی ءَ گوشت کہ نیشنل ایمرجنسی آپریشن سینٹر وتی رنگ ءِ یک بے دروریں مرکز اِنت، اے سرجمیں سرکاری ادارگ آنی یکجاھیں حکمت عملی ءِ جوانیں رنگ ءَ عمل کنگ ءُ وھد ءِ سر ءَ آفت ءِ ھال ءِ نظام ءَ را مھکم کنگ ءِ واستہ یک ھاسیں اثاثہ ءِ رنگ ءَ سہرا بوتگ۔ وفاقی وزیر ءَ گوشت کہ زوتیں ھال ءِ نظام یک انچیں نظام اِنت کہ ایشی ءِ چار ءُ تپاسی ءِ واستہ سرجمیں دگنیا ءِ مردم ادا کاینت۔ ادا ایر کنگ بوتگیں نوکیں ٹیکنالوجی ءِ وسیلگ ءَ لس مھلوک ءَ را وھد ءِ سر ءَ سرپدی دیگ بیت کہ ایشی ءِ آسر ءَ جانی ءُ مال ءِ تاوان ءَ مزنیں کمی یے اتکگ۔ وفاقی وزیر ءَ گوشت کہ الس ءَ را سرپدی دیگ ءِ واستہ نہ ایوک ءَ میڈیا ءُ روایتی میڈیا ءَ چہ کمک زورگ بوتگ بلکیں پاک این ڈی ایم اے الرٹ الرٹ کشناک ءِ وسیلگ ءَ ھم شہری آناں وتی ڈیوائس آنی سر ءَ ساھت پہ ساھت ءَ سرپدی دیگ بوتگ۔ آئی ءَ گوشت کہ توامیں سیادی داروکیں وزارت، ڈویژن ءُ صوبائی حکومت آنی وت مہ وتی کمک ءَ گوں اے چیلنج ءَ گوں گر ءُ چیل بوھگ ءِ کوشست کنگ بوھگ ءَ انت، اے درگت ءَ سرجمیں بریفنگ ھم دیگ بوتگ۔ عطا اللہ تارڑ ءَ گوشت کہ قدرتی آفت آنی گوما گر ءُ چیل بوھگ ھر شہری ءُ سرجمیں چاگرد ءِ یکجائی ذمہ واری اِنت، ھما جاھاں کہ دریا آنی تہ ءَ تاوان، ابر ءِ ٹکر یا سیلاب ءِ ھترہ ھست، ھرکس ءَ را کمکی کار آنی تہ ءَ وتی کرد ءَ را سرگرمیں رنگ ءَ پیلو کنگ لوٹ ایت۔ وفاقی وزیر ءَ گوشت کہ لھتیں دمگ آنی تہ ءَ لھتیں روچ آنی تہ ءَ انچو ھور بوتگ کہ نارمل جاور آنی تہ ءَ شش ماہ ءَ ھم ھور نہ بوتگ۔ آئی ءَ گوشت کہ وزارت ءِ اھوالکاری ءُ نشریات ءِ نیمگ ءَ چہ توامیں سیادی داروکیں وزارت، ڈویژن ءُ این ڈی ایم اے ءِ ھمکوپگی ءَ وتی سرجمیں کرد ءَ پیلو کنت۔ وفاقی وزیر ءَ موسم ءِ چیلنج، زوتیں ھال ءِ نظام ءُ آفت ءَ گوں گر ءُ چیل بوھگ ءِ گامگیج آنی ھوالگ ءَ بلیٹن، ٹاک شوز ءُ سوشل میڈیا پلیٹ فارم آنی وسیلگ ءَ الس ءَ را سرپدی دیگ ءِ تہ ءَ پاکستانی میڈیا ءِ کرد ءَ را ساڑات۔ آئی ءَ گوشت کہ حکومت اے چیلنج ءَ گوں گر ءُ چیل بوھگ ءِ واستہ وتی کرد ءَ برجاہ دار ایت۔ آؤکیں روچاں گیشتر جوانیں پسو ءِ دیم ءَ کیت ءُ درستیں سیادی داروکیں ادارہ چہ آماچیں مردمانی کمک ءَ یکجاہ کار کنگ ءَ برجاہ دار اَنت۔