موسمیاتی بدلی یک میاں اوستمانی جیڑھے، ھما ملک کہ ایشی ءِ ذمہ وار ھم نہ اَنت آ چہ ایشی ءَ متاثر بنت، ما وتی حق ءَ چہ زمین ءَ زوریں، ڈاکٹر مصدق ملک

اسلام آباد۔28جولائی  (اے پی پی): موسمیاتی بدلی ءُ چاگردی یکوئی ءِ وفاقی وزیر ڈاکٹر مصدق ملک ءَ گشتگ کہ موسمیاتی بدلی یک گلوبل جیڈھے کہ ایشی ءِ سبب ءَ گلیشیر تیزی ءَ گوں پگھارگ ءَ انت، اے بدلی ءَ چہ گیشتر آماچیں ملک ہما انت کہ ایشی ءِ ذمہ وار ہم نہ انت، ما موسمیاتی بدلی ءَ گوں سیادی داروکیں ہر لیول ءَ وتی سیکشن ءَ زورگ ءَ انت۔ موسمیاتی بدلی ءَ گوں دیم پہ دیم بوھگ ءِ کرد، گرانیں وھد ءِ واستہ آپ ءِ ذخیرہ کنگ المی اِنت۔ آئی ءَ اے ھیالانی درشانی سئے شمبے ءِ روچ ءَ نیشنل ڈزاسٹر مینجمنٹ اتھارٹی ءِ تر ءُ تاب ءِ ساھت ءَ وفاقی وزیر آنی گوما نیوز بریفنگ ءَ گشتانک دیان ءَ کت۔ آئی ءَ گوشت کہ پاکستان اگاں چہ دگنیا گرین ہاؤس گیس آنی مزنیں کشوکیں ملک آنی تہ ءَ ھوار نہ اِنت بلے پاکستان ھما ملک اِنت کہ موسمی مٹ ءُ بدلی ءِ ھرابیں آسر آناں گیش ءَ چہ گیش تاوان دیگ ءَ اِنت۔ آئی ءَ گوشت کہ دگنیا ءِ سئے ملک آنی تہ ءَ 57درسد گرین ہاؤس گیس پیداک کنگ ءَ اَنت، وھدیکہ دہ ملک آنی تہ ءَ 70درسد گیس پیداک کنگ ءَ اَنت، ایشی ءَ چہ درجہ حرارت ءِ گیش بوھگ، گلیشیر آنی زوت پگھل بوھگ، جنگل آنی تباہی ءُ مزنیں کساس ءَ جنگل آنی ھلاسی ءِ وڑیں جیڈھ آنی سوب جوڑ بوھگ ءَ اِنت۔ آئی ءَ گوشت کہ گوستگیں لستیں ھپتگ آنی تہ ءَ 6 ہزار مردم وتی جان ندر کتگ انت، بیست ہزار مردم ٹپیگ بوتگ انت، وھدیکہ 40 ملین مردم بے لوگ بوتگ انت کہ اے یورپ ءِ 32 ملک آنی آبادی ءَ چہ گیش انت۔ آئی ءَ گوشت کہ پاکستان موسمیاتی انصاف ءِ ھاترا میاں اوستمانی تک ءَ وتی کیس ءَ را زبردستی ءِ گوما دعویٰ کنگ ءَ اِنت ءُ وتی ھک آنی واستہ اوشتات کنت۔ وفاقی وزیر ءَ گوشت کہ مزن وزیر محمد شہباز شریف ءِ سروکی ءَ حکومت ءَ موسم ءِ چیلنج آناں گر ءُ چیل بوھگ ءِ واستہ یکجائی حکمت عملی ءِ سرا عمل کتگ، ایشی ءِ چیر دستی ءَ فوڈ سیکیورٹی، فنانسنگ، پلاننگ، انفارمیشن ءُ واٹر مینجمنٹ ءِ توامیں سیادی داروکیں شوبگ آناں یکجائی کنگ بیت تانکہ 2019 ءَ توامیں کشار  آناں یکجاھیں رنگ ءَ دیمروئی کنگ بہ بیت۔ آئی ءَ گوشت کہ حکومت یک ٹیم ءِ رنگ ءَ کار کنگ ءَ انت ءُ توامیں سیادی داروکیں وزیر یکجائی ذمہ واری ءِ تہ ءَ الس ءَ گوں دیم ءَ اتکگیں جیڈھ آنی گیواری ءِ واستہ کار کنگ ءَ انت۔ ڈاکٹر مصدق ملک ءَ گوشت کہ انتظامی یکجاھی ءِ گوما نوکیں ٹیکنالوجی ءِ کارمرد کنگ ءِ عمل ھم بندات بوتگ، ایشی ءِ چیر دستی ءَ مصنوعی ذہانت، ڈیٹا سائنس، ڈرون، سیٹلائٹ ءُ واٹر ڈیٹا ءِ یکجا کنگ ءَ چہ جوان کشار  ءِ منصوبگ بندی ءِ ھاترا توانمند کنگ بوھگ ءَ اِنت، ایشی ءَ چہ الس ءَ را جوانیں آسراتی رس ایت۔ آئی ءَ گوشت کہ انوگیں موسمی جاور آنی رد ءَ رودراتکی دمگ آنی تہ ءَ ھاسیں رنگ ءَ گلگت بلتستان ءُ خیبر پختونخوا ءَ گیشیں ھور ءِ امکان است انت وھدیکہ جنوبی ءُ کوہستانی دمگ آنی تہ ءَ کمیں ھور ءِ امکان است انت، ایشی ءِ سبب ءَ یک نیمگے ءَ ھئور ءُ  توپان  ءِ سبب ءَ اے جاوراں ھیال ءَ دارگ ءَ چہ گوریچانی، کوہستانی، شہری ءُ کشت ءُ کشاری دمگ آنی واستہ جتا جتائیں، جامع ءُ مرکوزیں رھبند جوڑ کنگ بوتگ اَنت۔ آئی ءَ گوشت کہ شہر آنی تہ ءَ سکیں گرم ءُ گرمی ءِ آسر آناں گر ءُ چیل بوھگ ءِ واستہ صوبہ آنی کمک ءَ ھاسیں حکمت عملی ھم جوڑ کنگ بوھگ ءَ انت وھدیکہ کوہستگی دمگ آنی واستہ فوڈ سیکیورٹی ءِ ھوالگ ءَ ھم جتاھیں منصوبگ جوڑ کنگ بوتگ۔ ڈاکٹر مصدق ملک ءَ گوشت کہ آپ ءِ جوانیں بندوبست ءُ فوڈ سیکیورٹی ءِ واستہ ڈیم آنی تہ ءَ آپ ءِ جم کنگ ءِ گوما ایشی ءِ وھد ءِ سر ءَ ریگولیشن ھم المی اِنت تانکہ ربیع  ءُ  خریف  ءِ کشار  آنی وھد ءَ لوٹ ءِ رد ءَ آپ دست کپ ایت۔ آئی ءَ گوشت کہ حکومت آپ ءِ ریگولیشن، آپ ءِ نظام ءُ آپ ءِ ذخیرہ کنگ ءَ گوں ھوالگ ءَ جیڈھ آنی گیواری ءِ واستہ جزمیگ انت۔ آئی ءَ گوشت کہ زوننگ ءُ جوڑیشت ءِ جوان ریگولیشن ھم المی اِنت تانکہ قدرتی آفت ءِ وھد ءَ جانی ءُ مال ءِ تاوان ءَ را کم کنگ بہ بیت۔ آئی ءَ گوشت کہ آئین ءِ 18می مٹ ءُ بدلی ءَ چہ پد اے فطرت ءِ رد ءَ صوبائی ذمہ واری انت، البت فیڈریشن ھمک رنگ ءَ تکنیکی کمک ءُ آسراتی پجاری کنت۔ ڈاکٹر مصدق ملک ءَ وتی اے جزم ءِ درشانی کت کہ وفاقی حکومت صوبہ آنی گوما سرجمیں کمک ءَ موسمی آفت آنی ھلاپ ءَ گر ءُ چیل بوھگ ءِ واستہ ھرچ وڑیں گامگیج زورگ ءَ برجاہ دار ایت، نوکیں ٹیکنالوجی ءَ کارمرد کنت، آپ ءِ جوانیں رنگ ءَ بندوبست کنت ءُ الس ءِ جان ءُ مال ءِ رکھینگ ءَ برجاہ دار ایت۔\932