حکومت موسمیاتی بدلی ءِ چیلنج ءَ گوں گر ءُ چیل بوھگ ءِ ھاتر ءَ ساڑی  اِنت، کشت ءُ کشاری شوبگ ءِ رکھینگ ءِ ھاتر ءَ ھاسیں دلگوشی دیگ ءَ اِنت، رانا تنویر حسین

اسلام آباد۔28جولائی  (اے پی پی): راجی وردن ءُ وراک ءِ سلامتی ءُ پٹ ءُ پول ءِ وفاقی وزیر رانا تنویر حسین ءَ گوشت کہ حکومت موسمیاتی بدلی ءِ گیش بوھوکیں اثر آناں گر ءُ دار ءِ واستہ عملی گامگیج زورگ ءَ انت ءُ کشت ءُ کشاری شوبگ ءِ رکھینگ ءِ واستہ یک سرجمیں حکمت عملی ءِ جوڑ کنگ بوھگ ءَ انت۔ سئے شمبے ءِ روچ ءَ وفاقی وزیر آنی گوما نیشنل ڈیزاسٹر مینجمنٹ اتھارٹی ءِ تر ءُ تاب ءِ موہ ءَ بریفنگ دیان ءَ آئی ءَ گوشت کہ ضلعی تک ءَ یک جوان ایمرجنسی رسپانس سسٹم ءِ جوڑ کنگ ءِ ضلورت اِنت تانکہ موسمیاتی آفت آناں وھد ءِ سر ءَ گر ءُ دار کنگ بہ بیت، ایشی ءِ چیر دستی ءَ سیادی داروکیں ادارگ آناں ترند ءُ آپریشنل ءِ رد ءَ پاکی دیگ بہ بیت۔ رانا تنویر حسین ءَ گوشت کہ پاکستان ھما ملک آنی تہ ءَ ھوار اِنت کہ موسمیاتی بدلی ءِ آسر آنی سبب ءَ گیش ءَ چہ گیش آماچ بوھگ ءَ اَنت، وھدیکہ ملک ءِ کشت ءُ کشاری شوبگ ءَ را سک باز آماچ بوھگ ءَ اِنت، ایشی ءَ چہ فوڈ سیکیورٹی یک مزنیں چیلنج ءِ رنگ ءَ اِنت۔ آئی ءَ گوشت کہ وزارت ءَ نوکیں کشار  جوڑ کنگ ءِ واستہ وتی پٹ ءُ پول ءِ دائرہ کار ءَ را گیش کتگ کہ موسمی مٹ ءُ بدلی ءِ منفی اثر آناں دیم ءَ دارگ ءِ لائک بہ بنت۔ اے گپ ءِ ھمراھی ءَ کشار  ءِ کشت ءُ کشار ءِ وھد ءُ پاس ءُ رھبندانی تہ ءَ ھم بدلی آرگ بوتگ اَنت کہ کشار  ءَ را چہ شدیدیں گرم ءُ موسمی دگہ اثراں چہ رکھینگ بہ بیت۔ وفاقی وزیر ءَ گوشت کہ کپاس ءُ دھان ءَ ھوار جتا جتائیں کشار  آنی وھد ءُ پاس ءِ کشار ءِ نوکیں حکمت عملی ءَ جوانیں نتیجگ آنی درشان بوھگ ءَ انت، وھدیکہ کشت ءُ کشاری پٹ ءُ پول ءِ شوبگ ءَ ھم مزنیں دیمروئی کنگ بوھگ ءَ انت۔ آئی ءَ گیش گوشت کہ چنا ءِ کمک ءَ موسمیاتی بدلی ءِ چیلنج آنی گیواری ءِ واستہ یک سرجمیں منصوبگ ءِ سر ءَ کار کنگ بوھگ ءَ اِنت، ایشی ءَ چہ کشت ءُ کشاری شوبگ ءِ گنجائش ءُ لچک ءَ را گیش گیش کنگ بیت۔ رانا تنویر حسینب ءَ گوشت کہ مزن وزیر شہباز شریف ءِ سروکی ءَ حکومت اے جیڈھ ءِ سر ءَ سرجمی ءَ سرگرم ءُ سنجیدہ اِنت، ءُ امیت اِنت کہ آیوکیں سال ءَ موسمی بدلی ءِ چیلنج آنی گیواری ءِ گنجائش گیش گہتر بیت۔