پاکستان ءَ را گیش بوھوکیں آبادی ءُ موسمیاتی بدلی ءِ سبب ءَ مزنیں چیلنج آنی دیم ءَ انت، وفاقی وزیر خزانہ ءُ آمدنی سینیٹر  محمد اورنگزیب

اسلام آباد۔28جولائی  (اے پی پی): وفاقی وزیر برائے مالیات ءُ ریونیو سینیٹر  محمد اورنگزیب ءَ گوشت کہ پاکستان ءَ را گیش بوھوکیں آبادی ءُ موسمی بدلی ءِ سبب ءَ مزنیں چیلنج آنی دیم ءَ انت، ایشی ءَ گوں گر ءُ چیل بوھگ ءِ واستہ حکومت یک جامع حکمت عملی ءِ سر ءَ عمل کنگ ءَ انت۔ سئے شمبے ءِ روچ ءَ نیشنل ڈزاسٹر مینجمنٹ اتھارٹی ءِ تر ءُ تاب ءِ موہ ءَ بریفنگ دیان ءَ آئی ءَ گوشت کہ ورلڈ بینک ءِ کمک ءَ جتاجتائیں منصوبگ آنی سر ءَ کار بوھگ ءَ انت تانکہ لس مھلوک ءَ را موسمی مٹ ءُ بدلی ءِ ردیں آسر آناں چہ رکھینگ ءُ ایمن جوڑ کنگ بہ بیت۔ آئی ءَ گوشت کہ پاکستان ھما ملک آنی تہ ءَ ھوار اِنت کہ آ موسمی مٹ ءُ بدلی ءِ اثر آناں گیش ءَ چہ گیش آماچ اَنت، اگاں چہ جھان ءِ گرین ھاوس گیس ءِ کشگ ءِ تہ ءَ آئی ءِ بھر سک کم اِنت۔ اے سبب انت کہ حکومت میاں اوستمانی شریک آنی کمک ءَ موسمی بدلی ءِ رد ءَ وتی رد ءَ ردوم دیگ، قدرتی آفت آنی گوما گر ءُ چیل بوھگ ءِ واستہ صلاحیت سازی، آپ ءِ جوانیں بندوبست، کشت ءُ کشاری شوبگ ءِ مھکم کنگ ءُ چاگرد دوستیں دیمروئی منصوبگ آنی سر ءَ ھاسیں دلگوشی دیگ ءَ انت۔ وزیر ءِ ھزانگ ءَ گوشت کہ موسمی مٹ ءُ بدل ءَ گوں گر ءُ چیل بوھگ ءِ واستہ ایوک ءَ حکومتی گامگیج کفی نہ انت، بلے الس ءِ سرپدی ءُ یکجائی زمہ واری ھم سک باز المی انت۔ آئی ءَ گوشت کہ چاگردی رکھینگ، آپ ءَ گوں دلگوشی ءَ کارمرد کنگ، درچک کشت ءُ قدرتی وسیلگ آنی جوانیں کارمرد کنگ ءِ بابت ءَ شہری آنی تہ ءَ سرپدی پیداک کنگ وھد ءِ لوٹ اِنت تانکہ آیوکیں باھوٹ آنی واستہ ایمن ءُ برجمیں چاگرد جوڑ کنگ بہ بیت۔ سینیٹر  محمد اورنگزیب ءَ وتی جزم ءِ درشانی کت کہ حکومت ورلڈ بینک ءُ ایندگر دیمروئی شریک آنی کمک ءَ اے وڑیں منصوبگ آناں دیم ءَ برگ ءَ برجاہ دار ایت کہ موسمیاتی بدلی ءِ ھترہ آناں کم کنگ، اقتصادی برجائی، چاگرد دوستیں دیمروئی ءُ الس ءِ وشھالی ءِ تہ ءَ کمک رسیت۔