کابل۔ 10 فروری (اے پی پی) اوغانستان اٹی امریکہ و نیٹو فوج آتا کمانڈر آتا پاننگ ئِ کہ اوفتے طالبان آتون جنگ ئِ مون آ ودفنگ کن پین منہ ہزار فوجی تا گرج ئِ۔ جنرل جان نکولسن امریکی سینیٹ نا آرمڈ سروس کمیٹی ئِ پارے کہ اوفتے تون انسداد دہشت گردی آپریشن کن کافی فوج ارے۔ ولے اوزورشاغاکہ اوفتے اوغان فوج انا تربیت اٹی کمک کن ودکی فوجی درکارئِ۔ اوروس و ایران آ اوغانستان اٹی نیٹو ئِ لتاڑنگ نا کوشست نا دوبہ ئِ خلک۔ سینیٹ کمیٹی نا مون آ پیش مرسا جنرل نکولسن پارے کہ ننے منہ ہزار فوجی کارندہ غاتا کمتی نا مون تروکی ئِ ۔ اونا پاننگ ئس کہ او دا معاملہ ئِ صدر ڈونلڈ ٹرمپ نا پوسکن آ سیکرٹری دفاع جیمز میٹس نا مون آ تخانے۔ داوخت اوغانستان اٹی کل 1330 نیٹوفوجی تعینات ئُ ہرافتے ٹی امریکی فوجی تا تعینات 8400 ئُ۔ امریکہ نا طالبان تا برخلاف جنگی آپریشن 2014ءٹی باضابطہ وڑاٹ ایسر مسوسس ولے خصوصی فوجی دستہ غاتا کنڈآن اوغان فوجی تے کمک نا فراوانی نا چرجوئی برجاہ ئِ، اوغان فوج تے گدرینگوک آاِرا سال اٹی بھلو جانی نسخان اسے تون مون تروئی مسنے۔ جنرل نکولسن ملک انا ساڑی آ حالیت آتے’جنگی توقف‘ نا وڑاٹ بیان کرے ولے اونا پاننگ ئس کہ پیمانہ حکومت نا حق اٹی ئِ۔
