واشنگٹن۔ 27جنوری (اے پی پی) پاکستان نا معیشت اٹی گدرینگوک آ مسہ سال اٹی نمان گچینی بسنے۔ معیشت نا بحالی و بجلی نا کاختی نا مون ئِ توننگ وزیراعظم محمد نواز شریف نا نمان سرسہبی اسے۔ داخیال آتا درشانی ئِ او امریکہ ٹی پاکستان نا سفیر جلیل عباس جیلانی ”پاکستان اٹی کشت وکشار و خلقی شونداری“ پنی ئُ کتاب اسے نا مون پاشی و سیمینار آن تران کرسا کرے۔ کتاب نا مصنف ڈاکٹر سہیل جے ملک، ڈاکٹر ڈیوڈ سپیل مین، ڈاکٹر پال دوروش و ڈاکٹر نزہت احمد ئُ۔ سفیر جلیل عباس جیلانی داوخت آ پارے کہ ماضی ٹی پاکستان اٹی کشاری بشخ انا کارکڑد لائخی آن کم مسنے۔ ساڑی حکومت داہیت آن آگاہ ئس کہ پاکستان نا معیشت اٹی کشت و کشار نا کڑد بے حد اہمیت تخک۔ دا بشخ 42.3درسد خواری کش آتے روزگار فراوان کننگ تون نیزگار نا چٹفنگ و صنعت آتے خام مال انا فراوانی ٹی ہم اہم کڑد ادا کننگ ئِ۔ کشت و کشار خاص کر خلقی معیشت اٹی بامعنی بدلی اتسا نن پاکستانی معیشت نا تقدیر ئِ ٹھوس بنداو تیا بدلیفنگ نا تغ ئِ حقیقت جوڑ کننگ کینہ۔ کتاب آ تران کرسا اوپارے کہ مصنف آک دا کتاب اٹی پاکستان اٹی کشت وکشار ئِ مون تروک چیلنج آتا ذکر ئِ کرینے و دریائے سندھ انا خڑک انا علاقہ غاتیٹی آبپاشی و دیر انا انتظام ئِ شرہ ٹی ایسونو۔ پاکستانی سفیر پارے کہ ہراوخت اسکان دیر ئِ کوڑی کننگ نا لائخی ٹی ودکی مفک ، پاکستانی آبی جارحیت نا خلیس آتیان دوچار سلک۔ داحالیت آتے مون آ تخسا پاکستان نا ساڑی حکومت دیامر بھاشا ڈیم کون آ بھلا ڈٹ آتا بنائِ کرے۔ پوروی آن پد دا 7.4ملین ایکڑفٹ لائخی اتون ملک اٹی غٹ آن بھلا آبی کوڑی مریک ہراڑآن 4500میگاواٹ بجلی ہم ودی مریک۔ داڑتون اوار اوار سی پیک ڈٹ انا رداٹ دے و تہوآن بجلی ودی کننگ اٹی ہم زرکاری کننگ انگ ئِ۔ پاکستانی سفیر مستی پارے کہ کتاب نا مصنف آک بجاوڑاٹ داہیت انا ہم درشانی ئِ کرینو کہ پاکستان اٹی خلقی معیشت ئِ خصوصی وڑاٹ شونداری تننگ نا گرج ئِ۔ حکومت نا وژن 2015ءنا کمک اٹ پوسکن آ ایگریکلچر ائزڈ فوڈ سیکورٹی ئِ نیشنل پالیسی ڈائیلاگ اٹی اوار کننگک ہراڑآن خلقی علاقہ غاتیٹی نیزگاری ٹی کمتی و شونہالی ئِ ممکن جوڑ کننگ مریک۔
