جارجیا۔ 23جنوری (اے پی پی) امریکی ریاست جارجیا نا ایمرجنسی کمامدارآتا پاننگ ئِ کہ طوفان اٹی 19بندغ تپاخت و کیہیک ٹھپی مسنو۔ احوالکارآتارداٹ ریاست جارجیا نا گورنر نیتھن ڈیل نا پاننگ ئِ کہ ریاست نا چار علاقہ غاتیٹی ہڑدڑی حالیت نافذ کننگانے۔ قومی موسمیاتی ادارہ نا پاننگ ئِ کہ جارجیا و فلوریڈاٹی پین طوفان و بگولہ غاتا گمان ئِ۔ جارجیا ایمرجنسی مینجمنٹ ایجنسی پارینے کہ جارجیا ٹی تپاخت کروک آ 12بندغ نا تعلق سویلی کک، بروکس و بیرن نا علاقہ غاتیان ئس۔ دافتیان ہفت بندغ اسہ عارضی ئُ اُراسے ٹی رہینگارہ، ہراتم طوفان اوفتا ہند آتون ڈوک لگا۔ ہڑدڑی ادارہ نا کارندہ ٹم پرویس نا رداٹ اسہ پارک اسے ٹی کم وود 40انا خڑک عارضی ہند ئسر ہرافتیان نیمہ تا بھس مسنے۔ امریکی صدر ڈونلڈ ٹرمپ داوخت آ گورنر نیتھن ڈیل اتون ہیت و گپ اٹی جانی نسخان آ است ہسونی نا درشانی ئِ کرینے۔ یات سلے کہ گدرینگوک آ ہفتہ آ مسی سپی ریاست اٹی طوفان اٹی چار بندغ تپاخت کریسر۔