کابل۔ 20جنوری (اے پی پی) دے ٹکی اوغانستان اٹی امریکی جاسوس جہاز اسے نا جلہو اٹی داعش نا چار باسک تپاخت کریر، قندہار اٹی اسہ چیک پوسٹ اسے آ طالبان تا جلہو اٹی اِرا پولیس کارندہ تپاخت و 5ٹھپی مسر۔ اوغان میڈیا نا رداٹ کمامدارآک پاریر کہ تدوک آ دے ننگرہار نا ضلع آچین اٹی امریکی جاسوس جہاز اس اسہ مشتبہ ٹھکانہ اسے نشانہ جوڑ کرے ، داکارروائی ٹی شدت پسند تنظیم داعش نا 4جنگوڑو تپاخت کریر۔ کارروائی بندر خوڑ نا ہند آ مس۔ کمامدارآک دارداٹ مستی سرجم احوال آتے فراوان کتوس۔ قندہار اٹی اسہ چیک پوسٹ اسے آ طالبان تا جلہو اٹی اِرا پولیس کارندہ تپاخت و 5ٹھپی مسر۔ کمامدارآک پاریر کہ طالبانک میوند نا علاقہ ٹی اسہ سیکورٹی چیک پوسٹ اسے آ جلہو کریر۔ طالبان تا دا کارروائی ٹی اِرا پولیس کارندہ غاتا تپاخت ئِ پک کننگانے۔ داکان بیدس دے ٹکی صوبہ ننگرہار اٹی گدرینگوک آ مسہ تو اٹی کیہی کارروائی تیٹی 251عسکریت پسند آتا تپاخت نا داوا کننگانے۔ صوبائی پولیس چیف انا رداٹ دا کارروائیک کوٹ ، آچین و ایب و کیب علاقہ غاتیٹی کننگار۔
