کابل۔ 12جنوری (اے پی پی) دے ٹکی اوغانستان اٹی امریکی جاسوس جہازانا جلہو اٹی حقانی نیٹ ورک نا اِرا کمانڈرآتون اوار 4عسکریت پسند تپاخت کریر، فرح ٹی بارودی سرنگ نا دھماکہ ٹی اِرا نیاڑی تپاخت کریر۔ زابل اٹی طالبان تا جلہو اٹی 7پولیس کارندہ تپاخت کریر، طالبانک مغوی امریکی و آسٹریلوی پروفیسر آتا ویڈیو ئِ جاری کرے۔ اوغان میڈیا نا رداٹ اوغان کمامدارآک پاریر کہ تدوک آدے دے ٹکی صوبہ خوست انا ضلع صابری ٹی امریکی جاسوس جہاز اس عسکریت پسند آتا ٹھکانہ ئِ نشانہ کرے۔ داجلہو اٹی حقانی نیٹ ورک نا اِراکمانڈرآتون اوار 4عسکریت پسند تپاخت کریر۔ جلہو اٹی تپاخت کروک آ عسکریت پسند آتا سرجم احوال آتے تننگ تنے۔ صوبہ فرح ٹی بارودی سرنگ نا دھماکہ ٹی اِرا نیاڑی تپاخت کریر۔ سویلی صوبہ زابل اٹی طالبان تا جلہو اٹی 7پولیس کارندہ تپاخت کریر۔ کمامدارآک پاریر کہ طالبانک قلات نا خڑک پولیس نا اسہ پارٹی اسے آ جلہو کریر۔ کمامدارآتارداٹ دا جلہو اٹی 7پولیس کارندہ تپاخت و کیہیک ٹھپی مسر۔ دے ٹکی صوبہ ننگرہار اٹی اِرا جتا جتا بمب دھماکہ غاتیٹی اسہ پولیس کارندہ اس تپاخت و 9پین بندغ ٹھپی مسر۔ ہڑتوم آ دھماکہ غاک ضلع کوٹ اٹی مسر۔ دیکی صوبہ ہرات اٹی دہشت گردی نا سرجز آتا دوبہ ٹی مسہ ایرانی شاری ئِ دزگیر کننگا۔ کمامدارآک واقعہئِ پک کرسا پاریر کہ دزگیر مروک آ بندغ عسکری و دہشت گردی نا سرجزآتا اوار مسنو۔ داکان بیدس طالبانک مغوی امریکی و آسٹریلوی پروفیسر آتا ویڈیو ئِ جاری کرینو۔ 13منٹ انا دا ویڈیو ٹی ہڑتوم آ مغوی تینا رہائی کن خواست کرسا نشان تننگ انگ ئُ۔ ہڑتوم آ پروفیسر آتے منہ وخت مست برمتہ کننگاسس۔
