دیکی اوغانستان اٹی طالبان تا اِرا رڑتیٹی جنگ انا نتیجہ ٹی 10بندغ تپاخت، نیمروز اٹی جھیڑہ غاتیٹی 19عسکریت پسند تپاخت، کیہی کارروائی تیٹی اِرا کمانڈر تون اوار 4طالبان تا کسفنگ نا داوا

کابل۔ 09جنوری (اے پی پی) دیکی اوغانستان اٹی طالبان تا اِرا رڑآتیٹی جنگ انا نتیجہ ٹی 10بندغ تپاخت و چندیک ٹھپی مسر۔ نیمروز اٹی جھیڑہ غاتیٹی 19عسکریت پسند تپاخت کریر، کیہی کارروائی تیٹی اِرا کمانڈر تون اوار 4طالبان تپاخت کریر۔ اوغان میڈیا نا رداٹ کمامدارآک پاریر کہ دیکی اوغانستان اٹی طالبان تا اِرا رڑتیٹی جنگ انا نتیجہ ٹی 10بندغ تپاخت و چندیک ٹھپی مسر۔ دا جنگ ساڑی آ دے تیٹی روڈ انا خڑک تخوک بمب دھماکہ ٹی چندی عسکریت پسند آتا تپاخت کننگ آن پد بناءکرے۔ کمامدارآتارداٹ جنگ ضلع بکواٹی مولوی رسول و ہیبت اللہ اخوانزادہ نا مخ تف آتا نیام اٹ مننگ ئِ۔ طالبان تا کنڈآن داوخت اسکان دابابت ہچ ئُ بیان اس مون آ بتنے۔ دیکی صوبہ نیمروز اٹی جھیڑہ غاتیٹی 19عسکریت پسند تپاخت کریر۔ صوبائی گورنر نا رداٹ صوبہ نا ضلع خورشید اٹی عسکریت پسند آتا برخلاف کارروائی کننگا و داٹی 19عسکریت پسند تپاخت کریر۔ ارٹ میکو کنڈاطالبانک سرکاری داوا تے مسترد کرسا پارے کہ ریگ ریشان نا علاقہ پدریسہ طالبان تا کوزہ ٹی ئِ۔ کابل اٹی وزارت دفاع نا کنڈآن جاری اسہ بیان اسے ٹی داوا کننگانے کہ تدوک آ دے کیہی کارروائی تیٹی اِرا کمانڈر آتون اوار 4طالبان تپاخت کریر ہرافتے ٹی گمانی خودکش بمبارہم اوار ئسر۔ بیان اٹی دابابت مستی سرجم احوال آتے تننگ تنے۔