کابل۔ 26دسمبر (اے پی پی) اوغانستان اٹی اینخو سال جنگ انا سوب مروک آ مرک آک 30ہزار اسکان رسینگانو۔ اوغان وزارت دفاع و وزارت داخلہ نا کارندہ غاتا رداٹ، مچ آملک اٹی اوغان پولیس و دفاعی فوج انا کنڈآن انسداد بغاوت نا برجاہ کارروائی تیٹی 19ہزار 5سد آن زیات مزاحمت کار تپاخت و 12ہزارآن زیات ٹھپی مسنو۔ وزارت دفاع نا ترجمان کمکار محمد ردمانیش امریکی احوالکارآتے پارینے کہ کمامدارآک سد آ مزاحمت کار آتے دزگیر ہم کرینے۔ اواوغان فوج ئِ رسینگوک آ نسخان نا سرجم آتیان معلومدار کتو ولے امنا کرے کہ گدرینگوک آسال انا مقابلہ ٹی دانسخان 10درسد زیات ئِ۔ امریکی فوج انا رداٹ، 2015ءٹی اوغان قومی سلامتی و دفاعی فوج انا تقریباََ 20ہزار کارندہ ٹھپی مسنو ، ہرافتیان 5ہزار تپاخت کرینو۔ اوغانستان نا پوسکن جوڑجاڑی نا بابت خصوصی انسپکٹر جنرل نا رپورٹ نا رداٹ 2016ءنا اولیکو ہشت تو انا وخت 5500آن زیات اوغان فوجی جتا کارروائی تیٹی خلنگار و 10ہزار ٹھپی مسر۔
