میکسیکوسٹی۔ 21دسمبر (اے پی پی) میکسیکو ٹی آتش بازی نا مارکیٹ اٹی دھماکہ غاتیٹی 29 بندغ تپاخت و 50 ٹھپی مسنو۔ احوالکار آتارداٹ دا دھماکہ شار آن تقریباََ 20کلومیٹر نا فاصلہ غاواقع سان پابلیتو مارکیٹ اٹی مسنے۔ دارالحکومت میکسیکو سٹی ٹی کمامدارآتا پاننگ ئِ کہ آتش بازی نا گڑاتا اسہ بازار اسے ٹی دھماکہ غاتیان 29 بندغ تپاخت و کیہیک ٹھپی مسنو۔ وڈیو منظراٹی علاقہ مول انا پلویڑ اٹی نظر بننگ ئِ و پدریسہ چنکا دھماکہ غاتا توار بِننگ انگ ئِ۔ میکسیکو نا ریاستی ریڈکراس جاگہ غا 25ایمبولینس گدریفینے و ہندی بندغ آتے مارکیٹ آن مرسلنگ نا پارت تننگانے۔ داکان بیدس کیہی امدادی کارندہ غاک ہم ہموڑے سرمسنو۔ ولے داوخت اسکان دا دھماکہ غاتا ہچ ئُ سوب اس مون آ بتنے ۔ ریاستی گورنر ارویئل اویلا نا پاننگ ئِ کہ داوخت آ اونا اولیکو اولیت ٹھپی تے بنائی طبی امداد تننگ نا ئِ۔ بنائی دھماکہ غان گڈ مارکیٹ اٹی ہرے اسکان خاخر لگا ہرانا مون ئِ توننگانے۔ داوخت آ کیہی وار آتش بازی نا گڑا دُن کہ چنکا راکٹ آمبارانگا پٹاخہ غاک ہم ترخسا کریر۔ میکسیکو نا صدر داوقعہ غا ڈکھ و غم نا درشانی ئِ کرینے ۔ یات سلے کہ سان پابلیتو مارکیٹ اٹی ہی اسہ ہندن ئُ حادثہ اس ستمبر 2005ءٹی ہم مسنے ہراملک انا آجوئی نا دے نا وخت آ ہندا بازار اٹی خاخر لگنگ آن کیہی بندغ آک ٹھپی مسوسر۔
