کابل۔ 21دسمبر (اے پی پی) اوغانستان نا سیکورٹی فورس آک سویلی صوبہ ارزگان اٹی 30 عسکریت پسند آتا کسفنگ نا داوائِ کرینو ، قندوز اٹی آپریشن نا وخت اسہ فوجی کارندہ اسے تون اوار 9 عسکریت پسند تپاخت کریر، ننگرہار اٹی سیکورٹی فورس آتا کارروائی تیٹی شدت پسند تنظیم داعش نا 8کارندہ تپاخت کریر۔ اوغان میڈیا نا رداٹ ارزگان نا صوبائی پولیس چیف بریگیڈیئر جنرل ولی جان سرحدی میڈیا ئِ پارے کہ صوبہ ٹی آپریشن نا وخت اسہ خودکش جلہو گیر اسے تون اوار 30 عسکریت پسند تپاخت کریر۔ اوپارے کہ داکارروائیک ناچین و کابوتارخان نا علاقہ ٹی کننگار۔ دا آپریشن اٹی 40 عسکریت پسند آتا ٹھپی مننگ نا احوال ہم رسینگانے۔ قطبی صوبہ قندوز اٹی آپریشن نا وخت اسہ فوجی کارندہ اسے تون اوار 9 عسکریت پسند تپاخت کریر۔ کمامدارآتارداٹ صوبہ ٹی آپریشن پامیر ون نا بناءمسنے و داوخت اسکان اوٹی 9 باغی تپاخت و کیہی تا ٹھپی مننگ نا احوال آک ملانو۔ کمامدارآک داوخت اسہ فوجی اسے نا تپاخت ئِ پک کرینو۔ دے ٹکی صوبہ ننگرہاراٹی سیکورٹی فورس آتا کارروائی تیٹی شدت پسند تنظیم داعش نا 8کارندہ تپاخت کریر۔ داکارروائی ہسکہ مینہ نا علاقہ ٹی کننگا۔ ہنداوڑ جلال آباد اٹی سیکورٹی فورس آک مسہ طالبان ئِ دزگیر کرینو۔
