اقوام متحدہ۔ 20 دسمبر (اے پی پی) پاکستان اوغان طالبان تا یخ انا موسم نا وخت دُوارہ منظم مننگ کن پاکستانی گل زمین ئِ کاریم اٹ اتنگ نا دوبہ ئِ مسترد کرینے۔ اقوام متحدہ ٹی پاکستان نا قائم مقام آخبتی مندوب نبیل منیر سلامتی کونسل اٹی اوغانستان نا حالیت آتیا شرہ نا وخت درشانِ خیال کرسا کرسا پارے کہ پاکستان دہشت گرد آتا غٹ نیٹ ورک آتا چٹفنگ کن پرعزم ئِ۔ پاکستانی مندوب پارے کہ اوغانستان اٹی دہشت گردی نا واقعہ غاتیٹی ساڑی آ ودکی نا سوب آک اوغانستان نا تہٹی ئُ پیشن افس۔ اوغان سیکورٹی فورس آتا دلیری نا باوجود ہموڑے حالیت آک خراب مننگ ئُ۔ اوغان حکومت نا کنٹرول آن پیشن علاقہ غاتیٹی بھلو کچ اسے ٹی دہشت گرد و انتہاپسند رڑتا ساڑی گری اوغانستان و اونا ہمسایہ ملک آتا مریس وخت سوگوی کن اسہ بھلو چیلنج اسے۔ نن بیدس شاہدی آن خلوک آ دوبہ ئِ مسترد کینہ کہ اوغانستان نا طالبان یخ انا موسم نا وخت پاکستان اٹی تینے منظم کیرہ ضرب عضب نا سوب دہشت گرد آتا ٹھکانہ غاک درحقیقت اوغانستان اٹی منتقل مسنو و دہشت گرد آتا برخلاف دا آپریشن نا سرسہبی ئِ دنیا منانے۔ پاکستانی مندوب پارے کہ پاک اوغان سیم آ ہن و بر ئِ کنٹرول کننگ کن سخت بست و بند المی ئِ و دابابت علاقائی کہول آ انتظام اس داڑکن موثر اف کہ اوغان حکومت دا بابت ہڑتوم آ کنڈآتابنداو آ کاریم کننگ آ آمادہ افس۔ پاکستانی مندوب اوغان سروک آتا کنڈآن تین پہ تینی واک آتے کمکاری نا جوزہ آن ایسر کننگ نا عزم انا ستائِ کریر ولے پاریر کہ اوغانستا ن اٹی سیاسی شیف بڑزی و سلامتی ناحالیت آک گڑتی نا سوب ئُ۔ پاکستان برسلز اٹی اوغانستان کن کمکاری نا درشانی ئِ کرینے و او علاقائی کہول آ ہم کمکاری ئِ برجاتخک۔ پاکستان پائیدار امن کن پرعزم ئِ انتئے کہ اصلاحات آ سرسہبی اٹ عملدرآمد و امن و مفاہمت کن سرگرمی اٹ کوشست آتا انحصار داڑاٹی ئِ۔ اوپارے کہ امن و مفاہمت نا کوشست آتا نتیجہ غاتا مون آ بننگ داسکان سلوک ئِ ولے اونا زمواری ئِ پاکستان آ خلنگ مفک۔ پاکستان تینا اوغان ایلم و ایڑ تا اسہ جوان ئُ آخبت اسے کن جہد اٹی اوفتے تون سلوک ئِ۔ داکان مست طالبان سفیر محمود سیکال خیال آتا درشانی نا وخت پارے کہ یخ انا موسم طالبان تے کن جنگ آن رخصت نا موسم ئِ۔ ہرانا وخت او پاکستان اٹی مدرسہ غاتیٹی اڈ کیرہ۔ اوغٹ دُن انگا رڑ تتون پارے کہ او اوغان حکومت تون ہیت وگپ اٹی اوار مریر۔
