واشنگٹن۔ 16دسمبر (اے پی پی) امریکی صدر براک اوباما دا عزم انا درشانی ئِ کرینے کہ امریکی صدارتی گچین کاری تیٹی مبینہ نیام تمنگ آ روس انا برخلاف کارروائی کننگک۔ برطانوی نشریاتی ادارہ نا رداٹ اوداہیت ئِ این پی آر تون ہیت کرسا پارے۔ اوپارے کہ ننے ایکشن ہلنگ نا گرج ئِ و نن ہلینہ۔ داکان مست وائٹ ہاﺅس نا پاننگ ئس کہ امریکی گچین کاری نا دے تیٹی مروک آ ہیکنگ اٹی روسی صدر براہ راست اوار ئس۔ وائٹ ہاﺅس نا کنڈآن بیان جاری مننگ نا منہ گھنٹہ گڈ صدر اوباما پارے کہ کنا خیال اٹی داہیت آ ہچ ئُ شک اس اف کہ ہراتم اسہ درملکی حکومت گچین کاری نا ساکھ آ اثرانداز مریک تو ننے ایکشن ہلنگ نا گرج ئِ و نن داکارروائی ئِ تینامرضی اٹ کینہ۔ صدراوباما نا مستی پاننگ ئس کہ پیوٹن دابابت ننا جوزہ غاتیان واقف ئِ انتئے کہ ای اوڑتون براہ راست دابارواٹی ہیت کرینٹ۔ صدر براک اوباما نا سلاہکار بین روڈیس نا پاننگ ئس کہ اخس کہ نن روس انا معاملہ غاتا بارواٹی چانہ کہ امر پیوٹن حکومت ئِ کنٹرول کیک۔ نن بے کچ اہم سائبر پارت آتا ہیت ئِ کننگ اُن۔ یات سلے کہ روسی کمامدارہیکنگ نا دوبہ غاتا پدریسہ تردید ئِ کرسا کرینے۔
