واشنگٹن۔ 08دسمبر (اے پی پی) امریکہ نا پوسکن گچین مروک آ صدر ڈونلڈ ٹرمپ امریکی فوج انا مسکوہی جنرل جان کیلی ئِ تینا کابینہ ٹی داخلی سلامتی (ہوم لینڈ سیکورٹی )نا وزیر پندار کرینے۔ دا پنداری نا پڑو ئِ ڈونلڈ ٹرمپ نا خڑکی سلاہکارآک کریر ہرافتے پوسکن گچین مروک آ صدر انتقال اقتدار و پوسکن آ حکومت نا جوڑ کننگ نا زمواری ئِ تسوسس۔ ڈونلڈ ٹرمپ نا کمکارتارداٹ ریٹائرڈمیرین جنرل جان کیلی نا گچین کاری سویلی امریکہ نا ڈیہہ آن اونا واقفیت و منشیات ، دہشت گردی و ایلو خلیس آتے شکست تننگ نا داعزم انا بنداو آ کننگانے ہر اجنرل کیلی نا خیال اٹی نیامی و سویلی امریکہ ٹی ودی مننگ ئُ۔ داکان بیدس ڈونلڈ ٹرمپ امریکی ریاست اوکلاہاما نا اٹارنی جنرل اسکارٹ پرواٹ ئِ ماحولیات نا رکھ انا ادارہ نا سروک پندار کرینے۔ ڈونلڈ ٹرمپ داکان مست ہم امریکی فوج انا اِرا مسکوہی جنرل آتے تینا کابینہ ٹی جتا عہدہ غاتے کن پندارکرینے۔ پوسکن آ کابینہ ٹی جاگہ جوڑ کروک آتیٹی لیفٹیننٹ جنرل (ر) مائیکل فلن و ریٹائرڈ میرین جنرل جیمز میٹس اوار ئُ ہرافتے ڈونلڈ ٹرمپ بالترتیب قومی سلامتی نا سلاہکار و وزیر دفاع پندار کرینے۔