اسلام آباد۔ 21نومبر (اے پی پی) مسکوہی سفیر خالد خٹک پارینے کہ دہشت گرد آتا چٹفنگ کن فرقہ واریت نا مون ئِ توننگ المی ئِ۔ احوالکار آتون ہیت وگپ کرسا او ترک صدر رجب طیب اردوان نا بیان نا حوالہ ئِ ترسا پارے کہ دہشت گرد آتا چٹفنگ کن مسلم ملک آتا نیام اٹ اتحاد نا گرج ئِ۔ اوپارے کہ اسلام پرامن ئُ مذہب اسے القاعدہ و داعش کون آ دہشت گرد تنظیمک مسلمان تے نسخان رسیفنگ ئُ۔ اوپارے کہ دہشت گردی نا چٹفنگ کن شدت پسند آتا فلسفہ و سوچ ئِ بدل کننگ، نیزگاری و افلاس نا چٹفنگ کن غٹ مسلم ملک آتے اسہ ایلو نا کمک و انتہاپسندآتا پشت پناہی کروک آتا چٹفنگ المی ئِ۔ خالد خٹک پارے کہ دہشت گردی نا اسہ پین بنداوی سوب اس فرقہ واریت ئِ ہرانا چٹفنگ کن غٹ مسلم ملک آتے اواری اٹ کاریم کننگ نا گرج ئِ ۔ پاک ترک تعلقداری تا بابت چست کروک آ سوج انا ورندی ئِ ترسا اوپارے کہ پاکستان و ترکی نا الس نا نیام اٹ گہرہ و حقی ایلمی کون آ تعلقداریک ئُ و ترک صدر نا پاکستان نا دورہ آن ہڑتوم آ ملک آتا دوستانہ تعلقداریک پین سوگو مریرہ۔ مسکوہی سفیر پارے کہ پاکستان و ترکی نا نیام اٹ مروک آ معاہدہ غاتیان ہڑتوم آ ملک آک اسہ ایلو نا آزموندہ غاتیان مستفید مریرہ و واپاری لین و دین اٹی ہم ودکی مریک۔
