کابل۔ 31اکتوبر (اے پی پی) دے ٹکی اوغانستان اٹی ڈرون جلہو وفضائی کارروائی تیٹی 30عسکریت پسند تپاخت کریر، بغلان اٹی مارٹر جلہو اٹی اسہ ہی خاہوت نا 7باسک تپاخت کریر۔ اوغان میڈیا نارداٹ کابل اٹی وزارت داخلہ نا کنڈآن جاری مروک آ اسہ بیان اسے ٹی پاننگانے کہ تدوک آ دے کنڑ اٹی اسہ فضائی جلہو اسے ٹی 19عسکریت پسند تپاخت کریر ہرافتے ٹی درملکی ہم اوار ارے۔ بیان نا رداٹ کارروائی ضلع دانگام اٹی کننگا۔ دے ٹکی صوبہ ننگر ہار اٹی ڈرون جلہو آتیٹی داعش نا 11عسکریت پسند تپاخت کریر۔ صوبائی پولیس چیف انا رداٹ ڈرون جلہو ضلع آچین اٹی کننگا ہراٹی 11عسکریت پسند تپاخت کریر۔ قطبی صوبہ بغلان اٹی مارٹر جلہو اٹی اسہ ہی خاہوت نا 7باسک تپاخت کریر۔ کمامدارآتارداٹ طالبان تاکنڈآن بغلان بنجائی ضلع فائر کردہ مارٹر نا گولہ اسہ اُراسے آ تما ہرانا نتیجہ ٹی بندغ آک تپاخت کریر۔ کہوک آتیٹی نیاڑی و چناہم اوار ئسر۔ قندہار اٹی روڈ انا خڑک بارودی سرنگ اسے نا دھماکہ ٹی اسہ شاری اس تپاخت و ارٹ ٹھپی مسر۔
