کابل۔ 20اکتوبر (اے پی پی) اوغان فورسز آک صوبہ غزنی ٹی کارروائی نا وخت 150عسکریت پسند آتے تپاخت کننگ نا داوا کرینو، ننگر ہار اٹی فضائی کارروائی نا وخت طالبان تا شیڈو گورنر تون اوار 16عسکریت پسند تپاخت کریر، لوگر اٹی شدت پسند آک بارودی سرنگ آتا چٹفنگ کن کاریم کروک آ تنظیم نا 20کارندہ غاتے برمتہ کریر۔ اوغان میڈیا نا رداٹ صوبائی پولیس چیف بریگیڈیئر جنرل امین اللہ امر خیل پارے کہ غزنی ناپنچ ضلع غاتیٹی تدوک آ اِرا ہفتہ آن عسکریت پسند آتا برخلاف کارروائی جاری ئِ ہراٹی فوج و پولیس کارندہ غاک بشخ ہلنگ ئُ۔ اوپارے کہ داوخت انا وخت آ 150عسکریت پسند تپاخت کریر، کارروائی تیٹی بھلو کچ اسے ٹی سلہہ و گولہ بارود دوئی کننگا ولے او فک دا آپریشن اٹی سیکورٹی فورسز آتے رسینگوک آ نسخان نا بابت پاتویس۔ طالبان تاکنڈآن داسکان بارواٹی ہچ ئُ بیان اس مون آ بتنے۔ دے ٹکی صوبہ ننگرہار اٹی اسہ فضائی کارروائی اسے نا وخت طالبان تا شیڈو گورنر تون اوار 16عسکریت پسند آتے تپاخت کننگ ناداوا کننگانے۔ کمامدارآتارداٹ فضائی جلہو اٹی طالبان تا اسہ ٹھکانہ اسے نشانہ جوڑ کننگا۔ ننگرہار اٹی ساڑی آ تو تاوخت شدت پسند آتا برخلاف کیہی آپریشن کننگا۔ دا صوبہ ٹی داعش نا ڈھانچہ ہم اڈ ہلوک ئِ ۔ نیامی صوبہ لوگر اٹی شدت پسند آک بارودی سرنگ آتا چٹفنگ کن کاریم کروک آ تنظیم نا 20 کارندہ غاتے برمتہ کریر۔ صوبائی پولیس نا اسہ عہدیدار اس پارے کہ دا بندغ آک سٹرلنگ گلوبل آپریشن نا رداٹ کاریم کریرہ ، داوخت اسکان ہچ ئُ رڑیا تنظیم اس داواقعہ نا زمہ واری ئِ امنا کتنے۔
