کابل۔ 18اکتوبر (اے پی پی) اوغانستان نا صوبہ بغلان اٹی سیکورٹی فورسز آک کارروائی نا وختا 8عسکریت پسند آتے تپاخت کریر ، کابل اٹی مقناطیسی بمب اسے نا دھماکہ ٹی اسہ افسر اس ٹھپی مس، ارزگان اٹی سلہہ بند بندغ آک پنی قبائلی کسرشون ئِ سم کاری کرسا تپاخت کریر۔ اوغان میڈیا نا رداٹ کمامدارآک پاریر کہ اوغان فوج صوبہ بغلان نا قطبی علاقہ پل خمری ٹی عسکریت پسند آتا برخلاف تازہ کارروائی تا بنائِ کرینو۔ کمامدارآتا رداٹ دا کارروائی ٹی داوخت اسکان 8عسکریت پسند تپاخت و کیہیک ٹھپی مسنو۔ کارروائی ٹی فوج و پولیس کارندہ غاک بشخ ہلنگ ئُ۔ دارالحکومت کابل اٹی مقناطیسی بمب انا دھماکہ ٹی اسہ افسر اس ٹھپی مس۔ کمامدارآتارداٹ سے شنبے آ ٹرمینل ایریہ ٹی چیف ایگزیکٹو آفس نا اسہ افسر اسینا گاڈی ٹی دھماکہ مس۔ بمب مقناطیس نا کمک اٹ گاڈی اٹ لچفنگاسس۔ داوخت اسکان ہچ ئُ تنظیم یا رڑاس دا جلہو نا زمہ واری ئِ قبول کتنے۔ کابل اٹی ساڑی آ ہفتہ نا وخت دننگا جلہو آتا کچ اٹی ودکی مسنے۔ نیامی ارزگان اٹی سلہہ بند بندغ آک پنی قبائلی کسرشون ئِ سم کاری کرسا تپاخت کریر۔ صوبائی کونسل نا باسک امیر محمد پارے کہ سلہہ بند بندغ آک ضلع چوری ٹی سم کاری کرسا عمر محمد المعروف حاجی لالک ئِ تپاخت کریر، او اگرچہ حکومتی عہدیدار اس ہلوکہ واہم علاقہ ٹی پنی کسرشون اس ئس ہرا قبائلی جرگہ اڈترفیکہ، داوخت اسکان ہچ ئُ تنظیم یا رڑاس دا جلہو نا زمہ واری ئِ قبول کتنے۔
