لندن۔ 17اکتوبر (اے پی پی) امریکہ و برطانیہ شام و روس ئِ خبردار کرینو کہ اگہ حلب آ بمباری برجا سلیس تو ہڑتوم آ ملک آتیان پوسکنا اقتصادی پابندی تے عائد کننگ مریک۔ برطانوی نشریاتی ادارہ نا رداٹ برطانوی وزیر خارجہ بورس جانسن تون اوار پریس کانفرنس اٹی جان کیری پارے کہ حلب اٹی انسانیت نا برخلاف ڈوہ ہردے مننگ اٹی ئِ۔ اوحلب اٹی حالیت آتے غٹ آن بھلا انسانی بحران گوندانے۔ اوپارے کہ روس ئِ داہیت ئِ پہہ مروئی مرے کہ دا جنگ سیاسی ایسری آن بیدس ختم کننگ مفک۔ بورس جانسن ہم روس اتون پارینے کہ او جنگ بندی کرسا شامی الس نا کمک ئِ کے۔ اوپارے کہ جنگ بندی نا گرج ئِ و جنیوا ٹی دُوارہ مذاکرات نا بنائِ کننگے۔ ہڑتوم آ کسرشونک خواست کریر کہ یمن اٹی ہم جنگ بندی کننگے۔ جان کیری پارے کہ داوخت غیر مشروط جنگ بندی نا ئِ و ولدا مذاکرات نا بنائِ کننگے۔
