کابل۔ 14اکتوبر (اے پی پی) دے ٹکی اوغانستان اٹی اِرا ڈرون جلہو آتیٹی داعش نا 27باسک تپاخت کریر، کابل اٹی مقناطیسی بمب اسے نا جلہو اٹی اسہ پولیس کارندہ اس تپاخت و اِرا شاری ٹھپی مسر، اوغانستان اٹی ستمبر نا وخت بیدادی نا واقعہ غاتیٹی کم از کم 1065بندغ تپاخت و 727آن زیات ٹھپی مسر۔ اوغان میڈیا نا رداٹ تدوک آ دے امریکی جاسوس جہاز آک ننگرہار نا اِرا ہند آتیا داعش نا ٹھکانہ غاتے نشانہ جوڑ کریر۔ کمامدارآتارداٹ آچین و ہسکہ مینہ نا ضلع غاتیٹی داعش نا اِرا ٹھکانہ غاتیا مروک آ بمباری ٹی کم از کم داعش نا 27باسک آتا تپاخت نا احوال ملانے۔ تدینگوک آ منہ تو انا وخت ننگر ہار اٹی داعش نا سرجزآتیٹی نمان ودکی مسنے ۔ دارالحکومت کابل اٹی مقناطیسی بمب انا جلہو اٹی اسہ پولیس کارندہ اس تپاخت و اِرا شاری ٹھپی مسر۔ پولیس نا رداٹ دھماکہ کابل نا ہشت می ضلع ٹی ہمووخت آ مس ہراتم ٹریفک پولیس نا گاڈی اٹ اسٹ اس مقناطیس اتون بمب اس تخا۔ کابل اٹی ساڑی آ دے تیٹی داوڑنا واقعہ غاتیٹی نمان ودکی مسنے ۔ داکان بیدس اوغانستان اٹی ستمبر نا وخت بیدادی نا واقعہ غاتیٹی کم از کم 1065بندغ تپاخت و 727 آن زیات مسر۔ دا حساب وکتاب جتا ذریعہ غاتیان دوئی کننگانے ۔
