کابل۔ 05اکتوبر (اے پی پی) اوغانستان نا دے ٹکی صوبہ ننگر ہار اٹی اوغان اسپیشل فورسزنا آپریشن اٹی چار حقی ئُ ایلم تپاخت کریر، جلال آباد شاراٹی سد آ بندغ آک ڈرون جلہو اٹی لس شاری تا تپاخت نا برخلاف برانزی مچی کریر۔ بغلان اٹی اسہ جھیڑہ اسے ٹی 11طالبان تپاخت و 23ٹھپی مسر، داعش تون جھیڑہ نا نتیجہ ٹی اسہ امریکی فوجی اس تپاخت کرے۔ اوغان میڈیا نا رداٹ ننگرہار نا گورنر نا ترجمان عطاءاللہ خوگیانی پارے کہ ضلع خامہ نا علاقہ سنگر سرائی ٹی اوغان اسپیشل فورسزآک آپریشن کریر و داوخت آ چار شکبر بندغ ئِ تپاخت و پین کیہی تے دزگیر کننگا۔ اوپارے کہ داکارروائی اسہ طالبان کمانڈر اسے نا دزگیری کن کننگا و داوخت آ شکبر بندغ آک سم کاری کریر ہراناورندی ٹی سیکورٹی فورسز آک ہم سم کاری نا بنائِ کریر۔ اوپارے کہ دارداٹ جاست وپاست جاری ئِ۔ ارٹ میکو کنڈ ہندی خلقت آک حکومتی موقف مسترد کرسا پارے کہ اوغان فورسز آک نن نا دوبجہ نا خڑک اسہ شاری سے نا ہند آ چھاپہ خلکر و داوخت آ چار لس شاری تے، ہراحقی ئُ ایلم ئسر ، تپاخت کریر۔ ارٹ میکو کنڈ جلال آباد شار اٹی سد آ بندغ آک ڈرون جلہو اٹی لس شاری تا تپاخت نا برخلاف برانزی مچی کریر۔ شاری تا پاننگ ئس کہ تدوک آدے آچین ضلع ٹی امریکی ڈرون جلہو اٹی تپاخت کروک آ بندغ آک لس شاری ئسر۔ اوغان حکومت داوا کریسس کہ دا جلہو اٹی داعش نا باسک آک تپاخت کریسر۔ شاری تا رداٹ امریکی ڈرون جہاز اسہ اُراسے نشانہ جوڑ کریسس۔ قطبی صوبہ بغلان اٹی اسہ جھیڑہ اسے ٹی 11طالبان تپاخت و 23ٹھپی مسر۔ کمامدارآتارداٹ جھیڑہ طالبان تا جلہو آن پد مس و سم کاری نا تبادلہ ٹی مرک آک مسر۔ داکان بیدس اوغانستان اٹی داعش تون جھیڑہ نا نتیجہ ٹی اسہ امریکی فوجی اس تپاخت کرے۔ امریکی میڈیا نا رداٹ امریکی فوجی کارندہ غاک پارینو کہ صوبہ ننگرہار اٹی داعش تون جھیڑہ ٹی اسہ امریکی فوجی اس تپاخت کرینے۔ محکمہ دفاع نا کمامدارآک پاریر کہ دا فوجی کارندہ ہمووخت تپاخت کرے ہراتم اوغان فوج اتون اوار گشت انا وخت اسہ دیسی ساختہ بارودی سرنگ اس ترخا۔ جنرل جان نکلسن پارے کہ ننے ننے دانسخان آ دلی صدمہ ئِ۔ اومستی پارے کہ امریکہ اوغانستان اٹی دہشت گرد آتے شکست تننگ نا عزم آ سلوک ئِ۔ پینٹا گون پارینے کہ داواقعہ نا جاست وپاست جاری ئِ۔
