کابل۔ 04اکتوبر (اے پی پی) اوغان فورسز آک دے ٹکی صوبہ ننگرہار اٹی شدت پسند تنظیم داعش نا 56باسک آتے تپاخت کننگ نا داوا کرینو ، قندوزسٹی ٹی طالبان و سرکاری فورسزآتا نیام اٹ جھیڑہ غاتا چرجوئی برجائِ و نائب صدر رشید دوسم دا اہم علاقہ ٹی طالبان تا برخلاف جنگ انا سروکی ئِ سنبھالانے۔ کپیسا ٹی اسہ کارروائی اسے ٹی 13شدت پسند آتاتپاخت نا داوا کننگانے۔ اوغان میڈیا نا رداٹ ننگرہار پولیس کمانڈ نا کنڈآن جاری بیان اٹی پاننگانے کہ تدوک آ دے ضلع آچین و ضلع پیخہ ٹی سیکورٹی ادارہ غاک شدت پسند تنظیم داعش نا برخلاف کارروائی کریر۔ داوخت آ ڈغاری فورسز آتون اوار اوار فضائیہ آن ہم کمک ہلنگا، کمامدارآک داوا کرینو کہ کارروائی ٹی داعش نا 56عسکریت پسند تپاخت کرینو۔ کہوک آتیٹی درملکی ہم اوارارے۔ صوبہ قندوز نا دارالحکومت قندوز سٹی ٹی طالبان و سرکاری فورسز آتا نیام اٹ جھیڑہ غاتا چرجوئی برجائِ و نائب صدر رشید دوستم دااہم علاقہ ٹی طالبان تا برخلاف جنگ انا سروکی ئِ سنبھالانے۔ صوبائی پولیس طالبان تے شار آن پدی خسنگ و 25طالبان تے تپاخت کننگ نا داوا کرینو۔اوغان حکومت پولیس و فوج انا تازہ دم دستہ غاتے قندوز اٹی تعینات کرینے۔ کمامدارآتارداٹ قندوز شار انا رکھ اکن اتحادی فوج انا فضائیہ آن ہم کمک ہلنگ انگ ئِ۔ امریکی فوج انا کنڈآن کابل اٹی جاری بیان اٹی پاننگانے کہ امریکی فضائیہ دارداٹ اوغان حکومت تون کمک کننگ اٹی ئِ۔ اسہ دے اس مست طالبانک قندوز شار آ سخت جلہو آتا بنائِ کریسر۔ قطبی صوبہ کپیسا ٹی اسہ کارروائی اسے ٹی 13شدت پسند آتا تپاخت نا داوا کننگانے۔ قطبی صوبہ فاریاب اٹی برام اسے نا انکار آ شدت پسند آک نیاڑی اسے سم اٹ خلسا تپاخت کریر۔ داواقعہ ضلع کوہستان اٹی پیش بس ۔
