اقوام متحدہ۔ 08 ستمبر (اے پی پی) اقوام متحدہ نا سیکرٹری جنرل بان کی مون مچ آ دنیا نا ملک آتا حکومت و نجی بشخ اتون پارینے کہ او خواندگی نا کچ اٹی ودکی و پرامن، انصاف پسند، پائیدار و اجتماعی راج اکن اواری اٹ کاریم کیر۔ جہانی خواندگی کچ انا دے انا وخت آ تینا کلہو اٹی بان کی مون پارے کہ اینخو سال پائیدار شون نا ہدف آتے کن جہد نا بناءمسنے۔ و دا ہدف مچ آ دنیا نا خلقت ، ننا ڈغار، شراکت و امن کن ایکشن پلان اسے۔ اوپارے کہ خواندگی نا کچ اٹی ودکی ، پائیدار شون نا ہدف2030 ءنا بنجائی ٹک ئِ۔ دا انسانی حق، صنفی مساوات و پائیدار راج آتا بنداو ئِ۔ دانیزگاری نا چٹفنگ و مچ آ دنیا ٹی رہینگوک آ خلقت آتا شونہالی کن المی ئِ۔ ہنداسوب ئِ کہ سوگو شون نا ہدف 2030 ءٹی ہر بندغ نا معیاری تعلیم اسکان رسینگ ئِ باوری جوڑ کننگ آ خصوصی توجوہ تننگانے۔ اگرچہ مسکوہی پنچ عشرہ نا وخت آ خواندگی نا کچ اٹی ودکی کن بھلو پیش رفت اس مس ولے دابابت آن ہم بھاز گڑاسلوک ئِ۔ یات سلے کہ اقوام متحدہ نا تعلیمی، سائنس و دودوربیدہ ہی تنظیم (یونیسکو) اینو آن 50 سال مست 1966ءٹی 8 ستمبر آ خواندگی نا کچ انا جہانی دے انا وڑاٹ اڈتننگ نا پڑو ئِ کریسس۔ یونیسکو نا کنڈآن جاری اسہ بیان اسے ٹی پاننگانے کہ اینخو سال جہانی یوم خواندگی نا وخت آ مسکوہی نصف صدی نا وخت آ خواندگی نا کچ اٹی ودکی نا کوشست آتے تالان کننگ نا فیصلہ کننگانے۔
