ریلوے ءِ وفاقی وزیر ءَ گوں  سینئر وزیر پنجاب ءَ  گند ءُ نند ، یکجائی دیمروئی منصوبگ آنی سر ءَ دیمروئی  چار ءُ تپاسی

اسلام آباد۔28جولائی  (اے پی پی): وفاقی وزیر محمد حنیف عباسی ءَ گوں  پنجاب ءِ سینئر وزیر مریم اورنگزیب ءَ ریلوے ءَ   گند ءُ نند کت ایشی ءِ تہ ءَ صوبائی حکومت ءُ ریلوے ءِ کمک ءَ کنگ بوھوکیں جتا جتائیں دیمروئی منصوبگ ءُ آیوکیں گامگیج آنی بابت ءَ سرجمیں بریفنگ دیگ بوت۔ وزارت ریلوے ءِ پریس ریلیز ءِ رد ءَ دیوان ءَ پنجاب ءِ 8 سب اربن ریلوے روٹس  آنی سر ءَ دیمروئی ءِ چار ءُ تپاسی کنگ بوتگ۔ گند ءُ نند ءَ گوشگ بوت کہ ریلوے ءِ توامیں راہ آنی فزیبلٹی سرجم کنگ بوتگ، وھدیکہ باکی ءِ منصوبگ آنی فزیبلٹی ھم زوت سرجم کنگ بیت تانکہ ایشانی سر ءَ عملی کار بندات کنگ بہ بیت۔ صوبائی حکومت ءَ ریلوے لیول کراسنگ ءِ اپ گریڈیشن ءِ واستہ 9.7  ارب  کلدار ءِ فنڈ منظوری داتگ۔ اے منصوبگ ءِ چیر دستی ءَ پیسر ءَ چہ ایمنیں لیول کراسنگ آناں مرحلہ وار رنگ ءَ منڈیب کراسنگ ءَ بدل کنگ بیت کہ ایشی ءَ چہ انسانی جان سلامتی ءَ را دل یکیمی کنگ ءُ حادثہ آنی گر ءُ دار ءَ را مزنیں کساسے ءَ کمک رسیت۔ دیوان ءَ سر وزیر پنجاب ءِ گرین ریلوے راہداری منصوبگ ءِ بابت ءَ سرجمیں بریفنگ ھم دیگ بوت۔ ھال دیگ بوت کہ ریلوے راہداری ءِ 40کلومیٹر ءَ چہ گیش ءِ سر ءَ درچک ءِ کشت ءُ کشار کنگ بیت تانکہ چاگرد ءَ را سبز، وش ءُ آلودگی ءَ چہ پاک جوڑ کنگ ءَ کمک رسیت۔ ستھرا پنجاب پروگرام ءِ چیر دستی ءَ ریلوے اسٹیشن ءِ صفائی ءِ منصوبگ آنی دیمروئی ءِ سر ءَ ھم چار ءُ تپاسی کنگ بیت۔ دیوان ءَ گوشگ بوت کہ ساپ ءُ سلہ ءِ کار جوانیں رنگ ءَ روگ ءَ انت ءُ کارندہ شپ ءُ روچ وتی زمہ واریاں پیلو کنگ ءَ انت تانکہ مسافر آناں ساپ ءُ سلہ ءُ گہتریں چاگرد پجاری کنگ بہ بیت۔ دیوان ءَ لاہور ریلوے اسٹیشن آنی سرکولیشن ایریا ءِ اپ گریڈیشن ءِ ھوالگ ءَ ھم سرپد کنگ بوت۔ آئی ءَ گوشت کہ اے منصوبگ سرجمی ءِ گڈی سیم سر آنی تہ ءَ داخل بوتگ ءُ آیوکیں ماہ ءَ سرجمی ءِ امیت انت ایشی ءَ چہ مسافر آناں نوکیں ءُ گہتریں آسراتی رس ایت۔ بنجاھی وزیر ءَ پنجاب ریلوے ورثہ ءِ رکھینگ ءِ گامگیج ءِ ھم بنگیج کت، ایشی ءِ اولی بھر ءَ لاہور، راولپنڈی ءُ تکلا ریلوے اسٹیشن آنی راجدپتری ورثہ ءِ رکھینگ، بحالی ءُ جوب کنگ ءِ واستہ گامگیج چست کنگ بیت۔ ریلوے ءِ وزیر ءَ گوشت کہ پاکستان ریلوے ءِ راجدپتر ءَ اولی رند ءَ صوبائی حکومت اے وڑیں مزنیں کساس ءَ ریلوے ءِ دیمروئی منصوبگ آنی تہ ءَ سرمایہ کاری کنگ ءَ اِنت، ایشی ءَ چہ وفاقی حکومت ءُ صوبگ ءِ نیام ءَ مثالی کمک ءِ یک درپشناکیں مثال اِنت۔ آئی ءَ گوشت کہ پنجاب حکومت ءِ کمک ءَ ریلوے ءِ بنیاتی ڈھانچہ، مسافر آنی آسراتی، ایمنی ءِ گامگیج، چاگردی گہتری ءُ راجدپتری ورثہ آنی رکھینگ ءِ منصوبگ نوکیں رفتار ءَ سرجم کنگ بنت، ایشی ءِ پائدگ زوت الس ءَ سر بنت۔