چیئرمین سینیٹ گوں ڈل ءَ تہران ءَ سر بیت، آیت اللہ سید علی خامنہ ای ءِ جنازہ ءِ نماز ءُ کبر ءُ کسارت کنگ ءَ بہر زوریت

تہران۔3جولائی  (اے پی پی): سینیٹ ءِ چیئرمین سید یوسف رضا گیلانی گوں مزن تک ءِ پاکستانی ڈل ءَ تہران ءَ سر بوتگ اودا آ آیت اللہ سید علی خامنہ ای ءِ جنازہ ءِ نماز ءُ جنازہ ءِ مراگش ءَ بہر زوریت۔ اے موہ ءِ سرءَ گورنر خیبر پختونخوا فیصل کریم کنڈی ھم چیئرمین سینیٹ ءِ ھمبراھی ءَ انت۔ سینیٹ ءِ سیکرٹریٹ ءِ رد ءَ ایران ءِ کارندہ ءُ پارلیمانی نمائندگاں پاکستانی ڈل ءَ را تہران ءَ سر بوھگ ءَ گوں گرمیں وش اتک کتگ۔ تہران ءِ تر ءُ تاب ءِ ساھت ءَ چیئرمین سینیٹ ءِ ایران ءِ سروکی ءُ پارلیمانی کارندہ آنی گوما ھم گند ءُ نند کنگ ءِ گمان اِنت، ایشی ءِ تہ ءَ دو نیمگی سیادی، پارلیمانی کمک ءُ وت مہ وتی مفاد ءِ ایندگر جیڈھ آنی سر ءَ گپ ءُ تران کنگ بیت۔ اے موہ ءِ سر ءَ پاکستان ءُ ایران ءِ نیام ءَ راجدپتری ، مذھبی ، دود ءُ ربیدگی ءُ براتی سیادی آناں گیش مھکم کنگ ءِ عزم ھم پدا پدر کنگ بیت ۔ تہران ءَ رسانکدر ءَ گوں تران کنان ءَ سینیٹ ءِ چیئرمین سید یوسف رضا گیلانی ءَ ایران ءِ سروکی، پارلیمنٹ ءُ الس ءَ گوں دلپدردی ءُ ھمدردی ءِ درشانی کتگ۔ آئی ءَ گوشت کہ آیت اللہ سید علی خامنہ ای اسلامی دگنیا ءِ تہ یک موثر، باوقار ءُ بااثریں مردمے بوتگ، آئی ءِ مذہبی، فکری ءُ سیاسی ازمت مدام یات کنگ بنت۔ چیئرمین سینیٹ ءَ گوشت کہ پاکستان ءُ ایران ءِ دیری ءَ چہ براتی سیادی است انت ءُ پاکستان اے غم ءِ ساھت ءَ ایرانی الس ءِ گوما سرجمیں رنگ ءَ یکوئی ءِ درشان ءَ کنت۔ آئی ءَ امیت سہرا کت کہ آیوکیں وھد ءَ دوئیں ملک آنی نیام ءَ وت مہ وتی کمک ءُ پارلیمانی سیادی گیش دیمروئی کن اَنت۔