وزیراعظم شہباز شریف نامچ آ ملک اٹی بے آب اٹ سرنچ آتا تیاری و کاریم اٹ اتنگ آ پورو پابندی خلنگ نا پارت

اسلام آباد۔ 03 جولائی (اے پی پی ) وزیراعظم محمد شہباز شریف متعدی مرض آتا تالانی نا دمدستی توننگ کن مچ آ ملک اٹی بے آب اٹ سرنچ آتا تیاری و کاریم اٹ اتنگ آ پورو پابندی خلنگ و مجرمانہ ڈیوالئی نا مرتکب بندغ و ہسپتال آتا برخلاف کانودی کارروائی نا پارت کرینے۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم شہباز شریف نا کماشی ٹی ایڈزومون انگا زڑدوئی کون آ متعدی مرض آتا توننگ کن چست کروک آ گام گیج آتیا جاچ دیوان جمعہ نادے آ داڑے اڈ ہلک۔ دیوان اٹی بنجائی وزیر کانود اعظم نذیر تارڑ، وزیر مملکت جان جوڑی ڈاکٹر مختار احمد بھرتھ ، اٹارنی جنرل آف پاکستان منصور اعوان، گلوبل فنڈ انا نمائندہ Izaskun Gaviria، پبلک ہیلتھ انا چاہندار، وزارت قومی جان جوڑی، ڈریپ انا نمائندہ و بڑزکو سرکاری کمامدارآک بشخ ہلکر۔ وزیراعظم دیوان آن تران کرسا پارت کرے کہ متعدی مرض آتا تالانی نا دمدستی توننگ کن مچ آ ملک اٹی بے آب اٹ سرنچ آتا تیاری و کاریم اٹ اتنگ آ پورو پابندی خلنگے۔ اوبرخلاف ضابطہ سرنچ آتا کاریم اٹ اتنگ اٹ اوار یا اونا توننگ اٹ مجرمانہ ڈیوالئی نا مرتکب بندغ و ہسپتال آتا برخلاف کانودی کارروائی کننگ و متعدی مرض آتا مون ءِ توننگ کن چاہندار آتا خصوصی کمیٹی اس جڑ کننگ نا پارت کرسا پارینے کہ کمیٹی تینا سلاہ و سوج آتے مرتب کننگ نا وخت آ صوبہ غاتون سلابت ءِ پک کے۔ وزیراعظم وزارت کانود و تعلقدار ادارہ غاتون اواری اٹ کانودی و ریگولیٹری فریم ورک اٹی المی ترمیم سلاہ کننگ ناہم پارت کرے۔ اوپارے کہ قومی کہول آ جوان حکمت عملی اس جوڑ کننگ  و گچین نفاذ ہی دا ویل انا ایسر ءِ، سرنچ آتیان  متعدی مرض آتا تالانی نا آخبتی توننگ کن ڈریپ میڈیکل ازباب آتا انڈسٹری تون سلابت کرسا پالیسی  گام گیج سلاہ کے۔ وزیراعظم پارے کہ متعدی مرض آتا تالانی نا توننگ نا برجاکوشست آتیٹی جہانی شریدار آتا کمکاری بے کچ اہم ءِ ، درمان تون تعلقدار ازباب آتا مینو فیکچرنگ و جان جوڑی نا بشخ انا عملہ ناجہانی آب انا ٹریننگ آ ہم خاص چکار کننگ نا گرج ءِ۔ دیوان اٹی وزیراعظم ناپارت آ جوڑ کروک خصوصی ٹاسک فورس و وزارت قومی جان جوڑی نا کنڈآن متعدی مرض آتا تالانی نا توننگ کن چست کروک گام گیج آتیا حوال تننگا۔