ہندوستان ءَ سندھ ءِ آپانی منوگری ءِ غیر قانونی معطل کنگ ءَ چہ میان استمانی قانونی نظام ءَ را نزور کتگ ءُ دمگ ءَ را تنازعہ ءِ خطرہ ءِ آماچ کتگ، معاون مزن وزیر اسحاق ڈار ءَ میاں اوستمانی سیمینار ” سندھ ءِ آپانی منوگری: امن ءُ دمگی استحکام ءِ وسیلہ“ ءَ گوں تران کنان ءَ گشتانک

اسلام آباد۔30جون  (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ گوشت کہ سندھ ءِ آپانی منوگری ءِ ناجائزیں رنگ ءَ مھتل کنگ ءَ بھارت ءَ نہ ایوک ءَ میاں اوستمانی کانود ءِ نظام نزور کتگ بلکیں اے دمگ ءَ را جیڈھ ءِ ھترہ ءِ آماچ کتگ۔ آئی ءَ اے ھیالانی درشانی سئے شمبے ءِ روچ ءَ وزارت ءِ اھوال ءُ شنگکاری ءِ کمک ءَ انسٹی ٹیوٹ آف ریجنل اسٹڈیز ءِ نیمگ ءَ برجم داشتگیں میاں اوستمانی سیمینار ’’سندھ ءِ آپانی منوگری: امن ءُ دمگی برجائی ءِ وسیلگ‘‘ ءِ گڈی دیوان ءَ گشتانک دیان ءَ کت۔ آئی ئَ گوشت کہ ٹرانس باونڈری دریا آنی نیام ئَ دوری ئَ را گیش کنگ ئِ بدل ئَ ایشاں یک دومی ئِ نزیک ئَ آرگ ئِ وسیلگ لیکگ بہ بیت۔ اے جذبہ ءِ تہا پاکستان ءَ گوں ہندوستان ءَ سندھ ءِ آپانی منوگری کتگ ات، اگاں چہ ایشی ءِ ھاتر ءَ پاکستان ءَ مزنیں مراعات دیگی ات۔ آئی ءَ گوشت کہ اسلام آباد ءِ گمان اِنت کہ اے منوگری ءَ چہ خطہ ءِ یک ھاسیں مشترکہ وسیلگ آنی کارمرد کنگ ءَ دراجیں مدت ءِ پیش گوئی ءُ استحکام ءِ پجاری بیت۔ آئی ءَ بھارت ءِ نیمگ ءَ چہ منوگری ءِ مھتل کنگ ءِ جار ءُ منوگری ءِ رد ءَ پاکستان ءِ گوما مشترکہ آپی وسیلگ آنی ھوالگ ءَ کمک کنگ ءَ چہ انکار ءِ سر ءَ سک باز جیڈھ ءِ درشانی کت۔ آئی ءَ گوشت کہ منوگری آنی تقدس ھما بنیاتی رھبند آنی تہ ءَ ھوار اِنت کہ ایشی ءِ سر ءَ راج آنی نیام ءَ پرامن سیادی جوڑ کنگ بنت۔ آئی ءَ میاں اوستمانی براتی ءَ چہ لوٹ کتگ کہ آ آپ ءَ را سلاہ ءِ رنگ ءَ کارمرد کنگ ءِ موہ مہ دنت۔ سیمینار ءِ بنداتی دیوان ءَ گوں تران کنان ءَ وفاقی وزیر ءِ اھوالکاری ءُ نشریات عطا اللہ ترار ءَ گوشت کہ بھارت ءِ نیمگ ءَ سندھ ءِ آپانی منوگری ءِ بے ھیال کنگ نہ ایوک ءَ میاں اوستمانی کانود ءِ نظام ءِ مقدس ءَ را ھراب کنگ ءَ اِنت بلکیں اے جھان ءِ امن ءُ ایمنی ءِ واستہ ھم تاوان بار اِنت۔ وفاقی وزیر ئَ گوشت کہ دریائے سندھ پاکستان ئِ تہذیب ئِ بُن ھشت ئُُ ایشی ئِ پجار ئِ بھر اِنت۔ آئی ءَ گوشت کہ دریائے سندھ ءِ آپ آنی سر ءَ پاکستانی آں ناگزیریں ھک است انت۔ آئی ءَ گوشت کہ بھارت ءِ ناکامیں کوشست ءَ چہ منوگری ءَ را ناجائزیں رنگ ءَ مھتل کنگ بھارت ءِ واستہ میاں اوستمانی شرمندگی ءِ سبب جوڑ بوتگ۔ آئی ءَ گوشت کہ اے گامگیج ءِ اخلاقی، چاگردی ءُ قانونی بنیات انتہائی نزور انت۔ آئی ءَ میاں اوستمانی براتی ءَ را زور پر دات کہ آ ھاسیں رنگ ءَ جھان ءِ موسمیاتی بحران ءِ رد ءَ بھارت ءِ ناجائزیں کوشست آناں نوٹس بہ زور اَنت۔ پاکستان پیپلز پارٹی ءِ چیئرمین ءُ پیسریگیں درئی کارانی وزیر بلاول بھٹو زرداری ءَ گشتگ کہ اگاں آبنائے ہرمز ءِ بند کنگ ءَ گوں امن ءِ تصور کنگ نہ بیت گڑا سندھ ءِ آپانی منوگری ءِ مھتل کنگ ءَ ابید ھم دگنیا چوں دمگ ءَ امن ءُ ایمنی ءِ برجاہ دارگ ءِ توقع ءَ کنت۔ آئی ءَ گوشت کہ بھارت ءَ پاکستان ءِ جگولر رگ ءَ را نشانگ جوڑ کنان ءَ آپ ءَ را سلاہ ءِ رنگ ءَ کارمرد کتگ۔ آئی ءَ لوٹ کتگ کہ بھارت ءِ نیمگ ءَ چہ سندھ آپانی منوگری ءِ خلاف ورزی ءَ چست بوتگیں ھمکگامگیج پاکستان ءِ ھلاپ ءَ جنگ ءِ کارروائی زانگ بہ بیت۔ آئی ءَ میاں اوستمانی براتی ءَ را زور پر دات کہ آ پاکستان ءَ را اے منوگری ءِ ھلاپ ءَ بھارت ءِ ناجائزیں گامگیج آناں چیلنج کنگ ءِ تہ ءَ کمک بہ کنت تانکہ اے دمگ ءَ کش ءُ چیل ءِ تہ ءَ گیشی ءِ چہ رکّینگ ءُ اسٹریٹجک آفت ءِ نیمگ ءَ برگ بہ بیت۔ آئی ءَ آپ ءَ ھوار جھان ءِ یکجاھیں وسیلگ آنی سلاہ ءِ رنگ ءَ کارمرد کنگ ءِ ھلاپ ءَ یک میاں اوستمانی کنونشن ءِ ھم لوٹ کتگ۔ اے موہ ءِ سر ءَ موسمی مٹ ءُ بدلی ءِ وفاقی وزیر ڈاکٹر مسدق مسعود ملک ءَ گوشت کہ سندھ آپانی منوگری ءِ ھلاپ ءَ بھارت ءِ ناجائزیں کارروائی پاکستان ءَ موسمی بحران ءَ را گیش گیوار کنگ ءَ انت۔ آئی ءَ گوشت کہ اے ایوک ءَ موسمی بحران نہ انت ءُ ایوک ءَ آپ ءِ بحران نہ انت بلکینگ ءَ اے انصاف ءِ بحران انت۔ آئی ءَ گوشت کہ دگنیا ءِ یک مھکمیں منوگری ءِ ھلاپ ءَ بھارت ءَ میاں اوستمانی کانود ءِ بنیات لرز اِتگ اَنت۔ آئی ءَ گوشت کہ بھارتی کارروائی سرجمیں دگنیا ءِ تہ ءَ ڈاؤن اسٹریم ملک آنی ھک آناں نوکیں رنگ ءَ پیش دارگ ءَ اَنت، ایشی ءِ جھان ءِ آسر آناں میاں اوستمانی براتی ءَ را سرپد بوھگی اِنت۔ پیسریگیں وزیر دفاع انجینئر خرم دستگیر خان ءَ اے منوگری ءِ معطل کنگ ءَ پد بھارت ءِ نیمگ ءَ چست کتگیں درستیں ناجائزیں گامگیج آنی ذکر کتگ کہ ایشی ءِ تہ ءَ بگلیہار ءُ صلال ڈیم آنی دروازگ بند کنگ ءُ سندھ آپانی منوگری ءِ چیر دستی ءَ دریا آنی سر ءَ آپی منصوبگ آنی سرجمی ءَ را ترند کنگ ھوار اِنت۔ پیسریگیں دری کارانی وزیر مملکت حنا ربانی کھر ءَ گوشت کہ سندھ ءِ آپانی منوگری ءِ تہ ءَ ھرچ وڑیں بدلی ءِ واستہ یک ھاسیں میکانزم ءِ است انت۔ آئی ءَ گوشت کہ جھان ءِ بے وسی ءِ سبب ءَ بھارت یک میاں اوستمانی تک ءَ پابندیں منوگری ءِ ھوالگ ءَ وتی ناجائزیں کارروائی ءَ چہ رکگ ءِ ھاترا توانمند بوتگ۔ پیسریگیں نگران وفاقی وزیر کانود ءُ انصاف احمد بلال صوفی ءَ گوشت کہ میاں اوستمانی کانود ءِ رد ءَ ٹرانس باونڈری آپی وسیلگ گلوبل مشترکہ اثاثہ اَنت ءُ ھچ ملک وتی سیمسر آنی تہ ءَ چہ گوزوکیں آپ ءِ ملکیت ءِ دعویٰ کت نہ کنت۔ آئی ءَ گوشت کہ بھارت ءِ نیمگ ءَ چہ منوگری ءِ مھتل کنگ درور ءَ منوگری ءِ ھلاپ ورزی ءِ منگ اِنت، ایشی ءَ چہ پاکستان ءَ را کانود گامگیج آنی وسیلگ ءَ پسو دیگ ءِ ھک رسیت۔ پیسریگیں صدر نیشنل ڈیفنس یونیورسٹی لیفٹیننٹ جنرل (ریٹائرڈ) عامر ریاض ءَ گشتگ کہ بھارت ءَ سندھ آپانی منوگری ءِ خلاف ورزی ءَ پاکستان ءَ را داتگیں مغربی دریا آنی سر ءَ جتا جتائیں منصوبگ بندات کتگ انت، اے گپ ءِ ثبوت انت کہ منوگری ءِ مھتل کنگ ءَ پیسر ھم نئی دہلی ءَ پاکستان ءِ ھلاپ ءَ آپ ءَ را سلاہ ءِ رنگ ءَ کارمرد کنگ ءِ ارادہ بوتگ۔ پاکستان ءِ سندھ واٹر کمشنر سید مہر علی شاہ شاہ ءَ گشتگ کہ بھارتی کارروائی منوگری ءِ وت آرٹیکل 9 ءَ داتگیں تنازعہ ءِ گیواری ءِ میکانزم ءِ ھلاپ انت۔ آئی  ءِ رد ءَ بھارت ءِ نیمگ ءَ آپ ءِ ڈیٹا ءِ معطل کنگ ءِ سر ءَ اپسوز ءِ درشانی کتگ۔ ماسکو ءِ یونیورسٹی آف ورلڈ سیولائزیشنز ءِ سائنسی مرکز برائے میاں اوستمانی ءُ اسٹریٹجک اسٹڈیز ءِ سروک ڈاکٹر روکسالانا زیگون ءَ گشتگ کہ سندھ ءِ آپانی منوگری ءِ برجائی ءِ ھاتر ءَ میاں اوستمانی تک ءَ باز ستا کنگ بیت۔ آئی ءَ بھارت ءِ کارروائی آنی پد ءَ پاکستانی پالیسی ساز آنی ذمہ واریں رویہ ءِ ستا کرتگ ، ھاسیں رنگ ءَ بھارت ءِ مزنیں کارندہ آنی اشتعال انگیز بیان آنی رد ءَ۔ امریکی نبشتہ کار ءُ گلوبل پالیسی ءِ ماہرلوری واٹکنز ءَ گشتگ کہ بھارت ءِ نیمگ ءَ آپ ءِ ڈیٹا ءِ یلہ کنگ ءُ دریا ءِ غیر معمولی روانی ءِ بابت ءَ پاکستان ءِ نبشتہ کتگیں نمدیانی پسو نہ دیگ میاں اوستمانی کانود ءِ اصولانی خلاف ورزی انت۔ بیجنگ ءِ چین ءُ گلوبلائزیشن ءِ مرکز ءِ معاون صدر پروفیسر ویکٹر گا ءَ ہندوستان ءِ نیمگ ءَ سندھ ءِ آپانی منوگری ءِ معطل کنگ ءَ را انسانیت ءِ ھلاپ ءَ جرم لیک اتگ۔ آئی ءَ گوشت کہ بھارت میڈ اسٹریم ملک اِنت پرچا کہ پاکستان ءِ واستہ اگاں چہ اپ اسٹریم ملک اِنت بلے چین ءِ واستہ ڈاؤن اسٹریم ملک اِنت۔ آئی ءَ گوشت کہ چین پاکستان ءِ سر ءَ زور دیگ ءِ واستہ بھارت ءِ کوشست آناں بند کت کنت۔ آئی آر ایس ءِ صدر جوہر سلیم ءَ وتی گڈی گپانی تہ ءَ گوشت کہ پائیدار امن ایوک ءَ میاں اوستمانی کانود ءِ احترام، میاں اوستمانی زمہ واری آنی سر ءَ عمل کنگ ءُ ھما ادارگ آنی ستا ءِ وسیلگ ءَ ممکن اِنت کہ آ ملک آناں وتی جیڈھ آناں امن ءُ ایمنی ءِ رنگ ءَ گیش ءُ گیوار کنگ ءَ کمک کن اَنت۔ آئی ءَ گوشت کہ آپ ءِ دائمی سلامتی ءِ بڈوئی  ایوک ءَ استیں آپ ءِ کساس ءِ سر ءَ نہ اِنت بلکیں یقین دہانی، شفافیت، پیش گوئی ءُ کمک ءِ سر ءَ ھم بندوک اِنت، پمیشکا دیم ءَ روگ ءِ یکیں کشک سندھ ءِ آپانی منوگری ءِ سرجمیں رنگ ءَ عمل کنگ اِنت آئی ءِ روح ءُ حرف دوئیں رنگ ءَ اِنت۔