وفاقی وزیر سردار محمد یوسف ءَ اسلاموفوبیا ءِ ھلاپ ءَ اقوام متحدہ ءِ ھاسیں نمائندہ میگوئل موراتینوس ءَ گوں گند ءُ نند

اسلام آباد۔30جون  (اے پی پی): مذہبی کارانی وفاقی وزیر سردار محمد یوسف ءَ اسلاموفوبیا ءِ ھلاپ ءَ جنگ ءِ ھاترا اقوام متحدہ ءِ ھاسیں نمائندہ میگوئل موراتینوس ءَ گوں گند ءُ نند کتگ، ایشی ءِ تہ ءَ اسلاموفوبیا ءُ مذہبی نا رواداری ءِ گیش بوھوکیں رجحان آنی ھوالگ ءَ سرجمیں گپ ءُ تران کنگ بوتگ۔ گند ءُ نند ءَ جتا جتائیں تہذیب ءُ مذہبانی نیام ءَ گپ ءُ تران، وت مہ وتی کمک، ہم آہنگی ءُ چاگردی یکوئی ءِ واستہ یکجائی ءَ کار کنگ ءِ سرا تپاک کنگ بوت۔ وزیر مذہبی امور سردار محمد یوسف ءَ گوشت کہ اے جیڈھ ءِ گیواری ءِ واستہ یونا او سی ءِ گوما یکجائی ءَ کار کنگ ءِ واھشت مند اَنت۔ پاکستان ءَ غیر مسلم آبادی ءِ واستہ داخلہ، نوکری ءُ اسمبلیانی تہا نمائندگی ءِ واستہ کوٹہ ءِ جار جنگ بیت۔ بین المذاہب ہم آہنگی ونگ ءِ چیر دستی ءَ آ غیر مسلم عبادت جاہانی مرمت ءُ بحالی کنگ ءَ انت ءُ تعلیمی اسکالرشپ ءِ جار جنگ ءَ انت۔ ھمکسال 11 اگست اقلیتانی روچ ءِ رد ءَ برجم دارگ بیت کہ ایشی ءِ ھاتر ءَ بین المذاہب ہم آہنگی ءِ دیمروئی ءُ اقلیتانی حقانی سرا چمشانک دیگ بیت۔ پاکستان ءَ نندوکیں درستیں مذہب آنی سروکیں رہشون آنی گوما شور ءُ سلاھ ءَ یک بین المذاہب ہم آہنگی ءِ پالیسی ءِ منظوری دیگ بوتگ۔ حکومت ءِ چیردستی ءَ غیر مسلم آبادی ءِ مذہبی جشن ءُ بین المذاہب ہم آہنگی ءِ مراگش برجم دارگ بوہگ ءَ انت۔ سردار محمد یوسف ءَ گوشت کہ بھارت ءَ غیر ہندو اقلیت آنی نگیگیں جاور ءُ مذہبی آجوئی ءِ سر ءَ بندش جیڈھ ءِ سبب انت۔ مئے مذہب، پاکستان ءِ آئین ءُ رہشون ءِ فرمان اقلیتانی حقانی رکھینگ ءِ ضمانت ءَ دنت۔ اقوام متحدہ ءِ ھاسیں نمائندگ میگوئل موراتینوس ءَ گشتگ کہ آ مذہب ءُ تہذیب ءِ بنیاد ءَ نفرت ءُ جنگ ءِ گر ءُ دار ءِ ھاتر ءَ کار کنگ ءَ انت۔ نیوزی لینڈ ءِ مسیت ءِ سرا اُرش اسلاموفوبیا ءِ بدترین مثال بوتگ۔ اقوام متحدہ ءِ سیکرٹری جنرل ءِ ہدایت ءِ رد ءَ ستمبر 2019 ءَ چہ عبادت جاہ آنی ایمنی ءِ رکھینگ ءِ سر ءَ کار بندات کنگ بوتگ۔پاکستانی حکومت بین المذاہب یکوئی ءِ ھوالگ ءَ جوانیں کار کنگ ءَ انت۔