ریلوے ءِ راجدپتر ءَ 115ارب کلدار ءِ آمدنی ءِ ٹارگٹ سرجم بوتگ، ستمبر ءَ ایم ایل ون ءِ بنگیج ءِ گمان اِنت، حنیف عباسی

راولپنڈی۔29جون  (اے پی پی): ریلوے ءِ وفاقی وزیر حنیف عباسی ءَ گوشت کہ پاکستان ریلوے ءَ اصلاحات ءِ عمل برجاہ انت ءُ ادارگ ءِ ڈیجیٹلائزیشن سرجم کنگ بوھگ ءَ انت۔ ریلوے ءِ راجدپتر ءَ 115ارب کلدار ءِ آمدنی ءِ ٹارگٹ سرجم بوتگ، وھدیکہ انوگیں آمدنی ءِ ٹارگٹ ھم 6جولائی ءَ تاں سرجم کنگ بیت۔مزن وزیر ستمبر ءَ ایم ایل ون منصوبگ ءِ روھمکی ءَ چہ کراچی سیکشن ءِ بُن ھشت ایر کنت۔ راولپنڈی ریلوے لوکو شیڈ ءَ نوک جوڑ بوتگیں گارڈ ءُ ڈرائیور رننگ روم ءِ بنگیج کنگ ءَ پد میڈیا ءَ گوں تران کنان ءَ آئی ءَ گوشت کہ ریلوے اسکول ءُ ہسپتال سرکاری ءُ نجی شریکداری ءِ چیر دستی ءَ آؤٹ سورس کنگ بوھگ ءَ انت وھدیکہ جتا جتائیں شوبگ آنی تہ ءَ رائٹ سائزنگ ھم کنگ بوتگ۔ آئی ءَ گوشت کہ آڈیٹر جنرل ءِ رپورٹ گمراہ کنوک اِنت ءُ ایشی ءِ وسیلگ ءَ راج ءَ را ردیں تاثر دیگ بوتگ۔ آئی ءِ رد ءَ ریلوے ءِ تہ ءَ 19درسد خسارہ ءِ رپورٹ راستی ءِ ھلاپ اِنت وھدیکہ 63ارب کلدار ءِ پنشن پاکستان ءِ سرکار ءِ نیمگ ءَ گرانٹ ءِ رنگ ءَ دیگ بیت ریلوے ءِ نیمگ ءَ نہ اِنت۔ حنیف عباسی ءَ گوشت کہ مارچ 2025 ءَ وزارت ءِ سر ءَ کار کنگ ءَ پد ایوک ءَ چار ماہ ءِ تہ ءَ آپریٹنگ لاگت 3.6ارب کلدار کم کنگ بوتگ کہ عملی رنگ ءَ منافع ءِ برابر اِنت۔ آئی ءَ گوشت کہ پنچ ریل آؤٹ سورس کنگ بوتگ، مال برداری ءِ شوبگ ءَ 32درسد گیشی بوتگ، ڈویژن آنی زمینی آمدنی ءَ ھم 50درسد ءَ چہ گیش گیشی بوتگ۔ وفاقی وزیر ءَ گوشت کہ پاور وین آنی اوور ہال بیست سال ءَ چہ نہ بوتگ، بلے باندا 16 نوکیں پاور پلانٹ آنی گرگ ءِ واستہ بولی پچ کنگ بنت ءُ آیوکیں سال ءِ 23مارچ ءَ تاں سرجمیں پاور وین آنی اوور ہال کنگ بیت۔ آئی ءَ گوشت کہ عوام ایکسپریس ءِ چار ریک آنی نوک کنگ ءِ کار سرجم بوتگ، وھدیکہ جون 2027ءَ تاں درستیں ریل نوکیں رنگ ءَ بحال کنگ بنت۔ایم ایل ون منصوبگ ءِ ھوالگ ءَ آئی ءَ گوشت کہ مزن وزیر ستمبر ءَ روھمکی ءَ چہ کراچی سیکشن ءِ بُن ھشت ایر کنت۔ مزن وزیر ءُ فیلڈ مارشل ءِ لوٹ انت کہ ایم ایل ون منصوبہ زوتاں چہ زوت سرجم کنگ بہ بیت۔ آئی ءَ گیش تران کت کہ ایم ایل تھری روھمکی ءَ چہ زاهدان منصوبگ ءِ سر ءَ ھم کار برجاہ انت ءُ آئی ءِ ھواری ءَ ایشی ءِ سر ءَ عملی کار بندات کنگ ءِ کوشست کنگ بوھگ ءَ انت۔ آئی ءَ گوشت کہ ای سی سی ءَ ایم ایل تھری منصوبگ ءِ منظوری داتگ۔ حنیف عباسی ءَ گوشت کہ راولپنڈی ریلوے اسٹیشن ءِ درائیں بھر لاہور ءِ ماڈل ءِ سر ءَ اپ گریڈ کنگ بیت، ایشی ءِ واستہ وسیلگ آنی بندوبست کنگ بوھگ ءَ انت ءُ دسمبر ءَ تاں منصوبہ سرجم کنگ ءِ کوشست کنگ بوھگ ءَ انت۔ آئی ئَ گوشت کہ اگاں آئی ئِ ساھت ئَ ریلوے ٹریک جوڑ کنگ مہ بوت گڈا آ منی بد بھتی بیت۔ آئی ءَ اے گپ ءِ پدرائی کت کہ مزن وزیر ءِ ہدایت ءِ رد ءَ مسافر ءُ مال باریں ریل آنی کرایہ ءِ تہ ءَ گیشی نہ بوتگ۔ ریلوے ءِ کرایہ ءِ تہ ءَ کمی ایوک ءَ پٹرولیم ءِ چیز آنی نہاد آنی تہ ءَ کمی ءِ سبب ءَ ممکن نہ اِنت۔ اے موہ ءِ سر ءَ وفاقی وزیر ءَ راولپنڈی ءَ نوک جوڑ بوتگیں گارڈ ءُ ڈرائیور رننگ روم آنی ھم بنگیج کت۔ ریلوے اسٹیشن ءُ لوکو شیڈ ءِ نزیک ءَ ھواریں اے نوکیں رننگ روماں ایر کنڈیشنڈ، آرام دہ جاہ ءُ شمسی نظام ءِ سرا بجلی ءِ بے رکاوٹیں رسگ ءِ ھاترا ایر کنگ بوتگ۔ حنیف عباسی ءَ گوشت کہ 36سال آنی تہ ءَ اولی رند ءَ گارڈ ءُ لوکو پائلٹ آناں اے رنگیں کوالٹی ءِ رہائشی آسراتی پجاری کنگ بوتگ ءُ آیوکیں وھد ءَ ملک ءِ ایندگہ مزنیں شھمک آنی تہ ءَ ھم ھمے وڑیں جدید رننگ روم جوڑ کنگ بنت۔