پاکستان رینجرز (سندھ) ءِ کیمپس ءِ سر ءَ بھارتی پراکسی جماعت الاحرار ءَ گوں سیادی داروکیں ناشرکارانی نیمگ ءَ بزدلیں اُرش ناکام بوتگ، 3 خوارج کشگ بوتگ، اوگان راج ءِ ٹپیگیں جاور ھال ءَ دزگیر کنگ بوتگ

راولپنڈی۔28جون  (اے پی پی): انٹر سروسز پبلک ریلیشنز ءَ گشتگ کہ 27 جون 2026 ءَ بھارتی پراکسی جماعت الاحرار ءَ گوں سیادی داروکیں خوارج ءِ بزدلیں ناشرکاری اُرش ءَ کراچی ءَ پاکستان رینجرز ءِ کیمپ ءِ سر ءَ اُرش کتگ۔ ارش کنوکاں کیمپ ءَ بمب تراک کنگ ءَ پد سیکورٹی باڑ ءِ ٹپّگ ءِ کوشست کتگ بلے رینجرز ءِ لشکر ءِ ھوشیار ءُ جزمیں پسو ءَ چہ آھانی بدیں ارادہ ناکام بوتگ اَنت۔ آئی ایس پی آر ءِ نیمگ ءَ یک شمبے ءِ روچ ءَ شنگ بوتگیں پریس ریلیز ءِ رد ءَ بزدلیں ناشرکاری اُرش ناکام کنگ بوتگ کہ ایشی ءِ تہ ءَ خوارج بیران بوتگ ءُ یک خوارجے ٹپیگیں جاور ءَ دزگیر کنگ بوتگ کہ آ اوگان راج دپتر ءِ شھری اِنت۔ تیرگواری ءِ وھد ءَ ملک ءِ بہادریں سپاھیگاں وتی زمہ واری ءِ پیلو کنگ ءِ وھد ءَ ابدمانیں قربانی داتگ ءُ شھادت ءِ بالادستیں درجہ ءِ سر بوتگ اَنت وھدیکہ 4 سپاھیگ ٹپیگ بوتگ اَنت۔ اے دمگ ءَ دگہ ھندی سرپرستی ءِ ناشرکارانی ھلاس کنگ ءِ ھاترا پٹ ءُ پول ءِ کارروائی برجاہ اِنت۔ آئی ایس پی آر ءَ گوشت کہ پاکستان ءِ سیکورٹی فورسز ءُ کانود ءِ نفاذ ءِ ادارگ آنی ’’استحکام ءِ ٹھینگ‘‘ ءِ وژن ءِ چیر دستی ءَ ناشرکاری ءِ ھلاپ ءَ برجاھیں مہم سرجمیں تیزی ءَ گوں برجاہ بیت تانکہ ملک ءَ چہ درملکی سرپرستی ءُ حمایت کتگیں ناشرکاری ءِ ھترہ ھلاس کنگ بہ بیت۔ آئی ایس پی آر ءَ وتی اے جزم ءِ ھم پدر کتگ کہ پاکستان وتی سپاھیگ آنی شھادت ءِ بدلہ ءِ واستہ اے اُرش ءِ مرتکب آنی ھلاپ ءَ بدلی کارروائی کنت۔ پاک اُرد ءِ سروک ءُ کمانڈر دفاعی اُرد بامردیں سپاھیگ آنی کھول ءِ گوما دلپدردی ءِ درشان کن اَنت۔ اے قربانی مئے وتی راج ءِ ھر پڑ ءَ رکھینگ ءِ بے دروریں جزم ءَ گیش مھکم کن اَنت۔