خاران ءُ مستونگ ءَ دو جتا جتائیں انسداد ناشرکاری ءِ آپریشن ءَ سیکورٹی فورسز ءَ 8 ناشرکار کش اِتگ اَنت،   آئی ایس پی آر

راولپنڈی ۔27جون  (اے پی پی): 25 ءُ 26 جون ءَ بلوچستان ءِ ضلع خاران ءُ مستونگ ءَ دو انسداد ناشرکاری آپریشن ءِ تہ ءَ سیکورٹی فورسز ءَ 8 ناشرکار کشتگ اَنت، اے آپریشن آنی مول ءُ مراد ھندی پراکسی فتنہ الهندستان ءِ ھلاس کنگ بوتگ۔ شمبے ءِ روچ ءَ پاکستان ءِ فوج ءِ پبلک ریلیشنز ڈیپارٹمنٹ ءِ نیمگ ءَ چہ شنگ بوتگیں پریس ریلیز ءِ رد ءَ 25 جون ءَ سیکورٹی فورسز ءَ بلوچستان ءِ ضلع خاران ءَ ناشرکارانی یک گلے ءِ رھادگ بوھگ ءِ سرا انٹیلی جنس ءِ بنیاد ءَ بندش جتگ ءُ پیشہ وارانہ ءُ مہارتی آپریشن ءِ آسر ءَ سئے ہندوستان ءِ پراکسی ناشرکار بیران ءُ بازیں مردم ٹپیگ بوتگ اَنت۔ ھمے رنگ ءَ 26 جون ءَ بلوچستان ءِ ضلع مستونگ ءَ وت کُش تراک ءِ بوت کنوکیں ھست بوھگ ءِ ھلاپ ءَ پیشگی انٹیلی جنس ءِ بنیاد ءَ آپریشن کنگ بوتگ ۔ پاک فوج ءِ اُرد ءَ آپریشن ءِ ساھت ءَ ناشرکار آنی پناہ گاہ ءَ را جوانیں رنگ ءَ نشانگ جوڑ کتگ ءُ زبردستیں تیرگواری ءَ پد یک وت کُش اُرش کنوک ءَ ھوار پنچ ناشرکار کش اِتگ اَنت۔ آئی ایس پی آر ءِ رد ءَ اے ناشرکارانی کارمرد کتگیں سلاہ، گولہ بارود، دستی تراکناکیں سامان ءُ موٹر سائیکل ھم برآمد کنگ بوتگ اَنت۔ اے دمگ ءَ ھستیں دگہ ھندی سرپرستی ءِ ناشرکارانی ھلاس کنگ ءِ ھاترا پٹ ءُ پول کنگ بوھگ ءَ اِنت۔ پاکستان ءِ سیکورٹی فورسز ءُ کانود ءِ نفاذ ءِ ادارگ آنی نیمگ ءَ چہ ”استحکام ءِ تعین“ ءِ وژن ءِ چیر دستی ءَ ناشرکاری ءِ ھلاپ ءَ بے مٹیں مہم (نیشنل ایکشن پلان ءِ وفاقی سپریم کمیٹی ءِ نیمگ ءَ منظور کنگ بوتگ) ملک ءَ چہ درملکی سرپرستی ءَ ناشرکاری ءِ ھلاسی ءِ ھاترا سرجمیں زور ءَ برجاہ بیت۔