زیتون نا بشخ پاکستان نا زرگزران کن پوسکن ءُ مزل نا نشان اس پک مننگ کیک، رانا تنویر حسین

اسلام آباد۔ 21 اکتوبر (اے پی پی) بنجائی وزیر قومی غذائی رکھ و پٹ وپول رانا تنویر حسین پارے کہ زیتون نا صنعت پاکستان کن شونہالی و کشاری خودکفالت نا پوسکن ءُ کسر ملنگ کیک۔ سے شنبے نادے آ پاکستان اولیوسمٹ 2.0 آن تران کرسا اوپارے کہ پاکستان زیتون نا پیدوار اٹی خودکفالت دوئی کننگ نا پبی لائخی تخک و دا فصل انا سوب آن خلقی زرگزران سوگو مریک۔ وزیرپارے کہ زیتون نا تیل پاکستان نا اسہ جہانی برآمدی برانڈ اس جوڑ مننگ نا لائخی تخک۔ حکومت زیتون نا بشخ اٹی پوسکن پٹ وپول، ٹیکنالوجی نا کاریم اٹ اتنگ و بزغرآتا تربیت ءِ مون آ دننگ ءِ تانکہ پیدوار اٹی کیہی گناودکی ممکن کننگ مرے۔ رانا تنویر حسین پارے کہ زیتون نا بشخ اٹی نجی بشخ انا شمولیت ستاکڑزک، و پبلک پرائیویٹ پارٹنر شپ انا رداٹ دا صنعت ترندی اٹ شون ہلنگ کیک۔ اوپارے کہ پائیدار کشت وکشار آخبت نا المی گرج ءِ و فوڈ سیفٹی ننا قومی اولیت ءِ۔ اومستی پارے کہ زیتون نا دسنگ نا مون آدننگ آن پاکستان ڈیہہ اٹی نمان ہند اس دوئی کیک۔ حکومت ہندن ءُ پالیسی جوڑ کننگ ءِ ہرا شریداری عمل و پوسکن پٹ وپول نا کمک اٹ زیتون نا بشخ ءِ سوگو کیک۔ رانا تنویر حسین ورنابزغرآتیا زورشاغا کہ زیتون نا دسنگ و ویلیو چین اٹی اہم کڑد ادا کیر۔ اونا پاننگ ئس کہ نن زیتون ءِ پاکستان نا پہچان جوڑ کینہ، انتئے کہ رکھوک و پائیدار خور ہی پاکستان نا روشنا آخبت نا ضمانت ءِ۔