ملکی صنعت آنی رجسٹریشن ءِ واستہ دلبڈی دیگ ءِ ضلورت انت، مزن وزیر شہباز شریف جائزہ ءِ دیوان ءَ گوں تران

اسلام آباد۔20اکتوبر  (اے پی پی): مزن وزیر محمد شہباز شریف ءَ ملکی صنعت آنی رجسٹریشن ءِ دلبڈی دیگ ءِ ضلورت ءِ سر ءَ زور پر دات ءُ گوشت کہ پاکستان ءِ صنعتی دیمروئی ملکی، کسانیں ءُ میاں اوستمانی صنعت آنی دیمروئی ءِ سر ءَ شرط اِنت۔ آئی ءَ دو شمبے ءَ ادا سمیڈا ءِ نوکیں رنگ ءَ جوڑ کنگ ءُ ایس ایم ایز ءِ دیمروئی ءِ ھوالگ ءَ چار ءُ تپاسی دیوان ءَ گوں گشتانک دیگ ءَ ات۔ دیوان ءَ وفاقی وزیر احد خان چیما، ڈاکٹر مصدق ملک، عطا اللہ تارڑ، اسپیشل اسسٹنٹ ہارون اختر ءُ ہمگرنچیں مزنیں کارندہ ءَ ساڑی بوتگ اَنت۔  دیوان ءَ اسمیڈا ءِ نوکیں رنگ ءَ جوڑ کنگ ءُ ایس ایم ایز ءِ دیمروئی ءِ واستہ کتگیں گامگیج آنی ھوالگ ءَ بریفنگ دیگ بوت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ دیوان ءَ گوں گشتانک دیان ءَ مزن وزیر شہباز شریف ءَ گوشت کہ کسان ءُ میاں اوستمانی صنعت آنی تہ ءَ زالبول آنی بھر زوری ءَ را گیش کنگ ءِ واستہ گامگیج وش اتک انت ءُ اے درگت ءَ سرپدی شنگ کنگ ءِ ضلورت انت۔ مزن وزیر ءَ ملکی صنعت آنی رجسٹریشن ءِ دلبڈی دیگ ءِ ضلورت ءِ سر ءَ زور پر دات تانکہ آ وتی کاروبار آناں دیمروئی دیگ ءِ واستہ آسانی ءَ گوں کریڈٹ ءَ سر بہ بنت۔ مزن وزیر ءَ پنت ءُ شون کت کہ اسمیڈا روڈ میپ ءِ سرا عمل درآمد ءِ واستہ یک ھاسیں ٹائم فریم ءِ ٹھینگ بہ بیت ءُ ایشی ءِ سرا زوتاں چہ زوت دل یکیمی کنگ بہ بیت۔ آئی ءَ گوشت کہ پاکستان ءِ صنعتی دیمروئی ملکی، کسانیں ءُ درنیامی صنعت آنی دیمروئی ءَ گوں بندوک انت ۔ دیمروئی کتگیں ملکاں ایس ایم ایز مزنیں صنعتانی واستہ خام مال ءِ وسیلہ ءَ دیم ءَ کار اَنت۔ زرعی سامانانی پروسیسنگ ءِ ھاتر ءَ میتگ ءِ دمگ آنی تہ ءَ ایس ایم ایز ءِ واستہ تربیت ءِ ضمانت دیگ بہ بیت۔ مزن وزیر ءَ سمیڈا ءِ نوک جوڑ کنگ ءُ ایس ایم ایز ءِ دیمروئی ءِ واستہ وزارت صنعت ءُ پیداوار ءِ نیمگ ءَ کتگیں گامگیج آنی سر ءَ دل یکیمی ءِ درشان کت۔ بریفنگ ءِ ساھت ءَ گوشگ بوت کہ ایس ایم ایز ءِ دیمروئی ءِ واستہ آزات کشمیر ءُ گلگت بلتستان ءَ کارگس پچ کنگ بوتگ ایشی ءَ را الس ءُ چیمبر آنی نیمگ ءَ ساڑائیگ بوھگ ءَ انت۔ نجی شعبہ ءِ ماہمکین آنی سر ءَ مشتمل اسمیڈا ءِ بورڈ جوڑ کنگ بوتگ وھدیکہ آیوکیں لھتیں روچ آنی تہ ءَ چیف ایگزیکٹو آفیسر ءِ گچین کنگ ءِ عمل سرجم کنگ بیت۔ دیوان ءَ گیش گوشگ بوت کہ سٹیئرنگ کمیٹی ءِ پرمان آنی سبب ءَ ایس ایم ایز ءِ گنجائش، وام ءِ پجاری، سرمایہ ءُ کمک ءِ تہ ءَ مزنیں گیشی بوتگ۔ ایس ایم ای ءِ شوبگ ءَ زالبول آنی دلبڈی ءِ واستہ زالبول آنی کاروباری پلیٹ فارم جوڑ کنگ بوھگ ءَ اِنت کہ ایشی ءِ بنیات مصنوعی ذہانت ءِ سر ءَ جوڑ کنگ بیت۔ اے پلیٹ فارم ءَ چہ زالبولاں کاروباری شعبہ ءِ بابت ءَ سرجمیں زانتکاری ءِ ھوار رجسٹریشن، ٹیکس ءِ معاملہ، ءُ مہارت ءِ بابت ءَ سرپدی رس ایت۔ دیوان ءَ ایس ایم ایز ءَ را رسمی معیشت ءِ بہمک جوڑ کنگ ءِ گامگیج آنی روڈ میپ ھم پیش کنگ بوتگ۔