حکومت ہمک کمیونٹی ءَ را دیمروئی ءِ واستہ یک وڑیں حق ءُ یک وڑیں موہ پجارینگ ءِ واستہ جزمیگ اِنت، مزن وزیر شہباز شریف ءَ ہندو کمیونٹی ءَ را دیوالی ءِ روچ ءَ مبارکی دات

اسلام آباد۔20اکتوبر  (اے پی پی): مزن وزیر محمد شہباز شریف ءَ گوشت کہ حکومت ھرچ کمیونٹی ءَ را یک وڑیں ھک ءُ دیمروئی ءِ واستہ یک وڑیں موہ پجارینگ ءِ واستہ جزم انت چہ آئی ءِ عقیدہ ءَ ابید۔ مزن وزیر ءَ پاکستان ءَ ھوار سرجمیں دگنیا ءِ ھندو کمیونٹی ءَ را دیوالی ءِ مبارک بات دیگ ءِ وھد ءَ گوشت کہ دیوالی رژن آنی میلہ اِنت ءُ ایشی ءِ تہ ءَ تہاری ءِ سر ءَ رژن ءُ ناامیتی ءِ سر ءَ اُمیت ءِ سوبمندی ءِ جشن ءِ درشان اِنت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ گوشت کہ دیوالی ءِ درگت ءَ برجم دارگ ءِ وھد ءَ بیا اِت ما درست جوانیں ذہنیت ءُ یکوئی ءِ ھیال ءَ گوں آیوکیں وھد ءِ نیمگ ءَ چارگ ءَ ایں ۔ مزن وزیر ءَ گوشت کہ پاکستانی ءِ بستار ءَ مارا وتی چاگرد ءِ تہ ءَ جتائیں رنگ ءُ دروشم ءِ سر ءَ پھر اِنت ایشی ءَ چہ مئے راجی پجار ءَ گیش مھکم بیت ءُ مئے یکجائی دود ءُ ربیدگ ءَ را وشھال کنت۔ مزن وزیر ءَ گوشت کہ اے موہ ءَ پاکستان ءَ ہندو کمیونٹی ءِ ارزشتی ایں ازمت آناں شرپ ءِ درشان کناں، مئے چاگردی، اقتصادی ءُ سیاسی شوبگ آنی تہ ءَ آئی ءِ کرد مئے راج ءَ مھکم جوڑ کنگ ءَ اِنت۔ آئی ءَ گوشت کہ پاکستان ءَ مذھب آنی تنوع مئے راج آنی تہ ءَ یکوئی ءِ یک راستیں وسیلگ اِنت، ءُ اے من ءَ بے دروریں وشی یے دنت کہ من ھندو ءُ ایندگر اقلیتی کمیونٹیز ءَ گوں سیادی داروکیں پاکستانی آں مئے ملک ءِ دیمروئی ءِ واستہ وتی مسلمانیں برات ءُ گہار آنی گوما ھمراہ داری ءَ کار کنگ ءَ گندگ ءَ آں ۔ مزن وزیر ءَ گوشت کہ راج ءِ پِت قائد اعظم محمد علی جناح ءَ یک انچیں پاکستان ءِ تصور کتگ ات کہ ایشی ءِ تہ ءَ مذھب، نسل ءُ ذات ءَ چہ ابید توامیں کمیونٹی برابری ءُ آجوئی ءَ چہ وشھال بہ بنت۔ حکومت اے قدر ءُ قیمتانی برجائی ءِ ھاتر ءَ جزم انت ءُ اے گپ ءِ پک کنگ ءِ ھاتر ءَ پاکستان ءِ ہمک کمیونٹی ءَ را چہ وتی عقیدہ ءَ ابید یک وڑیں حق ءُ دیمروئی ءِ ھاتر ءَ یک وڑیں موہ رس ایت۔ آئی ءَ ھندو راج ءِ ھاترا وتی نیکیں واھگ درشان کت ءُ گوشت کہ اے رُژنائی ءِ میلہ آھانی زندمان ءَ امن ءُ ایمنی ءِ آرگ ءُ مئے ملک ءِ تہ ءَ ھرچ مذھب ءِ مردمانی نیام ءَ یکوئی ءُ برات ءِ مھکمیں بند ءُ بوج ءِ دیمروئی ءَ بہ کنت۔