وزیراعظم شہباز شریف نا پاکستانی زرگزران نا بارواٹی بلومبرگ نا رپورٹ نا خیرمقدم

اسلام آباد۔ 06 اکتوبر (اے پی پی) وزیراعظم محمد شہباز شریف پاکستانی زرگزران نا بابت بلومبرگ نا ساڑی آ مثبت رپورٹ نا خیرمقدم ءِ کرساپارینے کہ دارپورٹ پاکستانی زرگزران آ جہانی زرکارآتا پت اٹی پدریسہ ودکی نا درشانی ءِ، شونداری نا دا سفر داسہ برجاسلک۔ دوشنبے نادے آ وزیراعظم آفس نا میڈیا ونگ انا کنڈآن جاری بیان نارداٹ وزیراعظم پارے کہ رپورٹ اٹی پاننگانے کہ پاکستان نا کریڈٹ ڈیفالٹ سواپ(Credit Default Swap-CDS)اٹی مضمر ڈیفالٹ نا گمان تیٹی 2200 بیسس پوائنٹ آتا خاطر خواہ کمتی واقع مسنے، پاکستان نا سی ڈی ایس نا نہاد اٹی نمان کمتی پاکستانی زرگزران آ جہای زرکارآتا پت اٹی آخبتی ودکی نا درشانی ءِ۔ وزیراعظم پارے کہ جہانی درجہ بندی نا رداٹ مون آ بروک  آ زرگزران تیٹی داوخت آ ترکیہ غان پد پاکستان ارٹ میکو نمبرآٹی ءِ ہرا ننا زرگزران کن جوان ءُ خبراسے۔ اوپارے کہ تدوک آحکومت نا ایسر آ ملک ڈیفالٹ نا دنگ آ سلوک ئس، بلومبرگ نا رپورٹ ننکن اسہ بھاز اہم ءُ مزل نا نشان و ننا شونداری نا سفر نا درشانی ءِ، حکومت پاکستان نا سخت کوشست و پاکستانی وجہانی کاروباری برادری نا کمک اٹ پاکستان نا شونداری نا قول پورو مرسا نظربننگ ءِ، داسہ شونداری نا داسفر اسُل سلپک۔