پاکستان نا الس قطر انا سرکڑدہ و الس نا است اٹ شرف ءِ کیرہ، انجینئر امیر مقام

دوحہ۔ 06 اکتوبر (اے پی پی) بنجائی وزیر امور کشمیر ، گلگت بلتستان و سیفران انجینئر امیر مقام پاکستان و قطر انا متکن و ایلمی تعلقداری و تین پہ تینی شونداری نا عز م انا درشانی ءِ کرساپارینے کہ پاکستان نا الس قطر انا سرکڑدہ و الس نا است اٹ شرف ءِ کیرہ، ننا تعلقداری اسیجائی قدر، ایمان و تین پہ تینی شونداری نا عزم آ تالان ءِ۔ داڑے جاری بیان نا رداٹ بنجائی وزیر انجینئر امیر مقام نا اعزاز اٹی شاہی خاہوت آن تعلق تخوک آ قطر انا مسکوہی وزیر چاگڑدی و موسمیاتی بدلی شیخ الفلاح بن ناصر نا کنڈآن دوحہ ٹی اسہ سُوارہ اس تننگا۔ انجینئر امیر مقام مہمانداری آ اونا منت واری ءِ ہرفے وپاکستان وقطر انا متکن و ایلمی تعلقداری تا تین پہ تینی شونداری نا عزم انا درشانی ءِ کرے۔ اوتوانائی، انفراسٹرکچر، سیل و سوات و افرادی قوت نا شونداری کون آ بشخ آتیٹی کمکاری نا بے پناہ لائخی ءِ تالان کرے۔ اوپارے کہ پاکستان نا الس قطر انا سرکڑدہ و الس نا است اٹ شرف ءِ کیرہ۔ ننا تعلقداری اسیجائی قدر، ایمان و تین پہ تینی شونداری نا عزم آ تالان ءِ۔ قطر انا مسکوہی وزیر قطر انا شونداری ٹی پاکستان کمیونٹی نا کڑد انا ستاءِ کرے و ڈیہہ اٹی امن، زرگزرانی کمکاری و انسانی شونداری ءِ مون آ دروک کوشست آتیکن شاہی خاہوت نا آخبتی مخ تفی نا درشانی ءِ کرے۔ اوقطر اٹی اسرائیلی جلہوآن پد پاکستان نا دمدستی سخت ردعمل نا ستاءِ کرے۔ اوبھارت تون ساڑی آ جنگ اٹی پاکستان نا سرسہبی نا ہم ستاءِ کرے۔ اووزیراعظم شہباز شریف و فیلڈ مارشل عاصم منیر نا عظیم سرکڑدہ و جنگ اٹی فیصلہ کن ورندی تننگ نا اوفتا ستاءِ کرے۔ اوپارے کہ پاکستان نا جنگ اٹی سرسہبی غٹ امت مسلمہ نا کاٹم ءِ بڑزکرے۔