عرب ءُ اسلامی دری کارانی وزیراں غزہ ءَ جامع ءُ برجمیں جنگ بندی ءِ ھاتر ءَ نوکیں پیشرفت ءَ را وش آتک کتگ

اسلام آباد۔5اکتوبر  (اے پی پی): عرب ءُ اسلامی دری کارانی وزیراں غزہ ءِ تہ ءَ یک سرجمیں ءُ برجمیں جنگ بندی ءِ واستہ انوگیں پیشرفت ءَ را وش اتک کتگ ءُ گوشت کہ اے دیمروئی غزہ ءِ الس ءِ دیم ءَ اوشتاتگیں گرانیں انسانی جاور ھال آنی گیواری ءِ واستہ یک راستیں موہ ءِ دات کنت۔ یکجائی بیان ءِ تہ ءَ اردن، متحدہ عرب امارات، انڈونیشیا، پاکستان، ترکی، سعودی عرب، قطر ءُ مصر ءِ دری کارانی وزیراں مرچی امریکی صدر ڈونلڈ ٹرمپ ءِ غزہ ءِ جنگ ءِ ھلاسی، یرغمال آنی یلہ کنگ ءُ درستیں یرغمال آنی سر ءَ زوت گپ ءُ تران بندات کنگ ءِ سوج ءِ پسو ءَ حماس ءِ نیمگ ءَ چست کتگیں گامگیج آناں وش اتک کتگ۔ دری کارانی وزیراں امریکی صدر ٹرمپ ءِ اے اپیل ءِ ھم وش اتک کتگ کہ اسرائیل زوت بمبتراکی بند بہ کنت ءُ سویپ ءِ معاہدے ءِ سر ءَ عمل کنگ بندات بہ کنت۔ آہاں صدر ٹرمپ ءِ دمگ ءَ امن ءِ ھاتر ءَ عزم ءِ ھم توسیپ کتگ ءُ اے دیمروئی ءَ را یک جامع ءُ برجائی جنگ بندی ءِ ھاتر ءَ یک راستیں موہ ءِ رنگ ءَ پیش داشتگ کہ ایشی ءَ چہ غزہ ءِ الس ءِ دیم ءَ اوشتاتگیں سنگینیں انسانی بحران ءِ گیواری ءَ کمک رس ایت۔ یک شمبے ءِ روچ ءَ پاکستان ءِ درئی کارانی کارگس ءِ نیمگ ءَ جاڑی بوتگیں بیان ءِ رد ءَ درئی کارانی وزیراں حماس ءِ اے جار ءِ ھم وش اتک کتگ کہ آ غزہ ءِ انتظامیہ ءَ را فلسطین ءِ عبوری انتظامی کمیٹی ءِ دست ءَ دیگ ءَ تیار اِنت کہ ایشی ءِ تہ ءَ بے رھبندیں ٹیکنوکریٹ ھوار اَنت۔ آہاں زور پر دات کہ تجویز ءِ موڈلٹیز ءُ درستیں تک ءُ پھنات آنی سر ءَ تپاک کنگ ءِ واستہ ترندیں رنگ ءَ گپ ءُ تران بندات کنگ بہ بیت۔ درئی کارانی وزیراں اے تجویز ءِ سر ءَ عمل کنگ ءِ ھاترا کوشست آناں برجاہ دارگ ءِ ھاترا وتی یکجاھیں عزم ءِ پدا زور دات، غزہ ءَ برجاھیں جنگ ءِ زوتیں ھلاسی ءُ یک جامعیں معاہدے ءِ سر ءَ زور پر دات کہ ایشی ءَ چہ دو ریاستی حل ءِ سر ءَ بنیات ءِ سر ءَ عادلانہ امن ءِ راہ پچ بیت کہ ایشی ءِ تہ ءَ غزہ ءِ بے رکاوٹیں کمک ءِ دیم دیگ ءِ وسیلگ ءَ دیم ءَ آرگ بیت۔ فلسطینی راج ءِ ، شہری آنی رکھینگ ، یرغمال آنی یلہ کنگ ، فلسطین ءِ اتھارٹی ءِ غزہ ءَ واتر کنگ ، غزہ ءُ مغربی کنارہ ءِ یکجا کنگ ، درستیں فریق آنی ایمنی ءِ واستہ یک موثریں سیکورٹی نظام ءِ جوڑ کنگ ، اسرائیل ءِ لشکر ءِ سرجمیں درکپگ ءُ غزہ ءِ نوک جوڑ کنگ ءِ سرا زھرشانی کنگ بوتگ۔