وفاقی وزیر پروفیسر احسن اقبال ءَ گشتگ کہ راجی دیمروئی ایوک ءَ امن، وانگ ءُ زانگ ءُ پالیسیانی تسلسل ءِ وسیلگ ءَ ممکن اِنت

لاہور۔5اکتوبر  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ گوشت کہ پاکستان ءَ را دیمروئی ءِ راہ ءَ ایر کنگ ءِ واستہ پالیسی آنی تہ ءَ تسلسل ءُ اصلاحات آنی برجائی ءِ سر ءَ عمل کنگ المی اِنت۔ اگاں ما کم چہ کم دہ سال ءَ پالیسی آنی تسلسل برجم بہ دار ایں ءُ وانگ ءُ زانگ ءِ دیمروئی ءِ سر ءَ سرجمی ءَ دلگوش بہ کن ایں گڈا پاکستان دگنیا ءِ دیمروئی کتگیں راج آنی لڑ ءَ ھوار بوت کنت۔ مزن وزیر محمد شہباز شریف ءِ سروکی ءَ ’’اُدان پاکستان‘‘ ءِ وژن ءِ چیر دستی ءَ ملک ءَ را وشیں باندات ءِ نیمگ ءَ برگ ءِ کوشست بوھگ ءَ انت۔ آئی ءَ اے ھیالانی درشانی یک شمبے ءِ روچ ءَ یک دمگی ھوٹلے ءَ برجم داشتگیں ”گلوبل ایجوکیشن کانفرنس ءُ انٹرنیشنل اسکول ایوارڈز“ ءِ مراگش ءَ گوں تران کنان ءَ کت۔ اے مراگش ءَ مزنیں کساسے ءَ چہ سرجمیں ملک ءَ چہ نامداریں وانگ ءُ زانگ ءِ زانتکار، وانگ ءُ زانگ ءِ ادارگ ءُ جتا جتائیں وانگ ءُ زانگ ءِ گلانی نمائندگاں بہر زرتگ۔ پروفیسر احسن اقبال ءَ گوشت کہ مرچی سرجمیں دگنیا ءَ استاد آنی جھان ءِ روچ برجم دارگ بوھگ ءَ اِنت ایشی ءِ مول ءُ مراد استاد آنی مزنیں کرد، وانگ ءُ زانگ ءِ نظام ءِ تہ ءَ ھمگرنچی ءُ وانینگ ءِ سٹینڈرڈ آنی ارزشت ءَ را پدر کنگ اِنت۔ وھدے کہ استاد وتی پیشہ وارانہ ذمہ واریاں جوانیں رنگے ءَ پیلو کنگ ءَ اَنت بلے چاگرد ءِ درستیں تبک ءِ ھاترا اے المی اِنت کہ استادانی عزت ءُ شرپ ءَ ھچ وڑ ءَ کم مہ کن اَنت پرچا کہ استاد ھما اَنت کہ راجانی آیوکیں باندات ءِ بُن ھشت ءَ ایر کن اَنت۔ آئی ءَ گوشت کہ راج آنی دیمروئی ءُ پیشرفت ءِ حقیقی راہ وانگ ءُ زانگ ءَ چہ گوزگ ءَ انت ءُ وانگ ءُ زانگ گریبی ءِ ھلاسی، روزگار ءِ موہ آنی تہ ءَ گیشی ءُ چاگردی برجائی ءِ بنیات ءَ پجارین ایت۔ وفاقی وزیر ءَ گوشت کہ دگنیا ءِ ھمک سوبمندیں مردم وتی سوبمندی ءِ پُشت ءَ وتی استاد آنی محنت ءُ رہشونی ءَ را محسوس کنت۔ والدین یک مردمے ءَ دنیا ءَ آرگ ءَ انت وھدے کہ استاد آئی ءَ زندگ بوھگ ءِ ھنراں وانینگ ءَ انت۔ من ءَ ھرچ پوزیشنے رستگ منی استادانی تربیت ءُ رھشونی ءِ مزنیں بھرے ھمے پوزیشن ءِ تہ ءَ ھوار اِنت۔ احسن اقبال ءَ گوشت کہ وانگ ءُ زانگ کجام ھم ملک ءِ ارزشتی تریں سرمایہ ءُ مستریں سرمایہ انت۔ اگاں پالیسی مدام برجاہ نہ دارگ بہ بنت گڑا راج بار بار صفر ءَ پدا کاینت۔ آئی ءَ گوشت کہ یک راجی ءِ بستار ءَ ما سئے رند ءَ اقتصادی رد ءَ کریش کتگ، نوں گیش ردی آنی گنجائش نیست، مارا ھما ملک آنی ماڈل آنی چہ دربرگ لوٹ ایت کہ آھاں یکوئی ءُ سائنسی منصوبگ بندی ءِ وسیلگ ءَ دیمروئی رس اِتگ۔ آئی ءَ گوشت کہ ایوک ءَ نوکیں ءُ پٹ ءُ پول ءِ سر ءَ بنیات ءِ سر ءَ بنیات ءِ وانگ ءُ زانگ ءِ نظام یک راج ءِ انفرادی ءُ اجتماعی توانائی ءَ را گیش کنگ ءَ انت، استاد راج آنی ذہنی ءُ فکری تربیت ءِ آرکیٹیکٹ انت، کجام ھم چاگرد ءِ کارکن ءِ سائنسی ءُ تکنیکی توانائی آئی ءِ وانگ ءُ زانگ ءِ معیار آنی سر ءَ بندوک انت، ایشی ءِ تہ ءَ استاد آنی کرد فیصلہ کنوکیں انت۔ احسن اقبال ءَ گیش گوشت کہ استاد آنی ھک ءُ زمہ واری آنی رکھینگ ءِ واستہ نہ ایوک ءَ راجی بلکیں میاں اوستمانی تک ءَ ھم یکجاھیں کوشست آنی ضلورت اِنت تانکہ اے کلاس ءَ را جھان ءِ تک ءَ گیش کارآمد جوڑ کنگ بہ بیت ءُ یک رژنائیں آیوکیں وھد ءِ واستہ مھکمیں بنیات ایر کنگ بہ بیت۔ آئی ءَ ملک آنی نیام ءَ استاد آنی تبادلہ، میاں اوستمانی نودربر پروگرام ءُ یکجائی پٹ ءُ پولی منصوبگ آناں دیمروئی دیگ ءِ وش آتک کت ءُ گوشت کہ اے وڑیں گامگیج آنی وسیلگ ءَ علمی معیار ءَ را گیش کنگ ءُ راج آنی نیام ءَ یکوئی ءَ را گیش کنگ بیت۔ وفاقی وزیر ءَ گوشت کہ من امن، دیمروئی ءُ وانگ ءُ زانگ ءِ منشور ءِ چیر دستی ءَ سیاست ءَ داخل بوتگ آں ءُ وتی حلقہ نارووال ءَ مزنیں زمیندار آناں شکست دیگ ءَ اے گپ ثابت کتگ کہ الس ءِ طاقت وانگ ءُ زانگ، امن ءُ دیمروئی ءِ بیانیہ ءِ تہ ءَ اِنت۔ آئی ءَ گوشت کہ مزن وزیر محمد شہباز شریف ءِ سروکی ءَ اودان پاکستان ءِ وژن ءِ چیر دستی ءَ ملک ءَ را وشیں باندات ءِ نیمگ ءَ برگ ءِ کوشست بوھگ ءَ انت۔ احسن اقبال ءَ گوشت کہ وژن 2025 ءِ چیر دستی ءَ حکومت ءِ مول ءُ مراد ملک ءِ ھر ضلع ءَ ھر شہری ءِ واستہ ہائیر ایجوکیشن ءِ آسراتی دیگ اِنت۔ ناروال ءِ مثال ءَ آئی ءَ گوشت کہ پیسر ءَ اودا یونیورسٹی یا کیمپس نہ بوتگ کہ ایشی ءِ سبب ءَ زانتکاریں نودربر مزنیں نمبر ءِ گرگ ءَ ابید ھم لوگ ءَ نندگ ءَ مجبور بوتگ اَنت بلے نوں بازیں نامداریں یونیورسٹی آنی کیمپس ءِ جوڑ بوھگ ءَ گوں ھزاراں نودربر وتی زانت ءِ تُن ءَ ھلاس کنگ ءَ اَنت۔ مراگش ءِ گڈ ءَ وفاقی وزیر ءَ گلوبل ایجوکیشن کانفرنس ءِ جارچین آناں مبارک بات دات ءُ وانگ ءُ زانگ ءِ ادارگ آنی سروک آنی تہ ءَ ایوارڈ بھر ءُ بانگ کت کہ آھاں جوانیں کارکردگی پیش داشتگ۔ اے موہ ءِ سر ءَ ساؤتھ ایشیا یونیورسٹی ءِ وائس چانسلر عمران مسعود ءَ وفاقی وزیر ءَ را شیلڈ دات ۔