دری کارانی وزیر سینیٹر اسحاق ڈار ءَ راجی اسمبلی ءَ گوں تران کنان ءَ اقوام متحدہ ءِ جنرل اسمبلی ءِ 80می دیوان ءِ ساھت ءَ پاکستان ءِ برجائیں کار آنی بابت ءَ باسک آناں سرپد کت

اسلام آباد۔3اکتوبر  (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ جمعہ ءِ روچ ءَ راجی اسمبلی ءَ گوں تران کنان ءَ اقوام متحدہ  ءِ جنرل اسمبلی ءِ 80می دیوان ءِ ساھت ءَ پاکستان ءِ برجائیں کار آنی بابت ءَ باسک آناں سرپد کت۔ درئی کارانی کارگس ءِ جارکش ءِ نیمگ ءَ جاڑی بوتگیں بیان ءِ رد ءَ آئی ءَ مزن وزیر محمد شہباز شریف ءِ فلسطین، جموں ءُ کشمیر، موسمیاتی انصاف، جھان ءِ مالیاتی نظام ءِ اصلاحات ءُ پائیدار دیمروئی ءِ زوتیں لوٹ ءِ ھوالگ ءَ اثر مندیں بیان ءِ ذکر کتگ۔ نائب مزن وزیر ءَ پاکستان ءِ مزنیں سفارتی رسائی، اقوام متحدہ ءِ جنرل اسمبلی ءِ درگت ءَ مزن تک ءِ مراگش ءُ دو نیمگی گند ءُ نند آنی تہ ءَ بھر زوری، امن ءِ کوشست آناں دیم ءَ برگ ءِ تہ ءَ جوڑیشت ءِ کرد ءُ فلسطینی ءُ کشمیری راج ءِ ھک آنی واستہ اصولی وکالت ءِ سر ءَ ھم ھاسیں رنگ ءَ گپ جت۔ نائب مزن وزیر سینیٹر محمد اسحاق ڈار ءَ نیویارک ءَ شور ءُ سلاھ ءَ پد پاکستان ءِ نیمگ ءَ چہ ھپت براتیں عرب اسلامی ملک آنی گوما جاڑی بوتگیں یکجائی بیان ءِ ھوالگ ءَ ھم ایوان ءَ سرپد کت۔ بیان ءِ تہ ءَ غزہ ءَ را معقول انسانی کمک ءِ بے رکاوٹ ءَ سر کنگ، فلسطینی آناں بے لوگ کنگ، اسرائیل ءِ سرجمیں درکپگ، غزہ ءِ نوک جوڑیشت ءُ دو ریاستی حل ءِ سر ءَ بنیات ءِ سر ءَ عادلانہ امن ءِ معتبریں راہ ءِ لوٹ کنگ بوتگ کہ ایشی ءِ چیر دستی ءَ غزہ مغربی کنارہ ءِ گوما سرجمی ءَ یکجا مانیت۔ آئی ءَ پاکستان ءِ یکجاھیں ءُ اصولی موقف ءِ پدا زور دات کہ دو ریاستی گیواری یک انصاف ءُ برجائی امن ءِ یکیں زندگ داروکیں راہ اِنت، ایشی ءِ تہ ءَ 1967 ءَ پیسر ءِ سیمسر آنی سر ءَ بنیات ءَ یک نزیکیں، آجو ءُ وت واجہیں فلسطینی ریاست ءِ جوڑ کنگ بیت کہ آئی ءِ دارالحکومت بیت المقدس اِنت۔ نائب مزن وزیر ءُ دری کارانی وزیر سینیٹر محمد اسحاق ڈار ءَ اسرائیلی قبضہ گیریں اُرد ءِ نیمگ ءَ گلوبل سمود فلوٹلا ءِ ناجائزیں رکینگ ءِ مذمت کتگ ءُ اے کار ءَ را میاں اوستمانی دریائی کانود ءُ انسانی اصولانی ھاسیں ھلاپ ورزی لیک اتگ۔ آئی ءَ ایوان ءَ را دل یکیمی دات کہ پاکستان فلوٹلا ءَ وتی شہری آنی ایمنی ءُ ایمنیں واتر بوھگ ءَ را دل یکیمی کنگ ءِ واستہ سفارتی کوشست آناں سرگرمیں رنگ ءَ دیم ءَ برگ ءَ اِنت۔ آئی ءَ وائٹ ہاؤس ءَ مزن وزیر محمد شہباز شریف ءُ امریکی صدر ڈونلڈ ٹرمپ ءِ نیام ءَ گند ءُ نند ءِ بابت ءَ ہم ایوان ءَ سرپد کت کہ ایشی ءِ تہا فیلڈ مارشل سید عاصم منیر ءَ ہم بہر زرتگ۔ آئی ءَ دلپھکی ءِ تبادلہ، پاکستان ءِ ناشرکاری ءِ ھلاپ ءَ کوشست آنی ستا، مئی ءَ پاکستان ءُ بھارت ءِ نیام ءَ جنگ بندی ءِ آسراتی ءِ تہ ءَ صدر ٹرمپ ءِ کرد ءُ توانائی ءَ ھوار کشت ءُ کشاری، آئی ٹی، کان ءُ معدنیات ءِ تہ ءَ امریکی سرمایہ کاری ءِ دعوت دیگ ءَ چہ بیپاری ءَ را گیش کنگ ءِ منوگری ءِ ھم ذکر کت۔