مزن وزیر محمد شہباز شریف ءَ اسرائیل ءِ اُرد ءِ نیمگ ءَ ” صمود غزہ فلوٹیلا “ ءِ سر ءَ بزدلیں اُرش ءِ مذمت کتگ ، درستیں کمکی کارندہ آنی زوت ءُ بے شرطیں یلہ کنگ ءِ لوٹ کتگ

اسلام آباد۔2اکتوبر  (اے پی پی): مزن وزیر محمد شہباز شریف ءَ اسرائیل ءِ اُرد ءِ نیمگ ءَ ” صمود غزہ فلوٹیلا “ ءِ سر ءَ بزدلیں اُرش ءِ سک باز مذمت کتگ ءُ سرجمیں کمکی کارندہ آنی زوت ءُ بے شرطیں یلہ کنگ ءُ فلسطینی آناں کمک ءِ بے رکاوٹ ءَ سر کنگ ءِ لوٹ کتگ۔ ’’ایکس‘‘ ءِ سر ءَ وتی کلوہ ءِ تہ ءَ مزن وزیر ءَ گوشت کہ وھد ءِ مستریں ضلورت ایش اِنت کہ اسرائیل ءِ بربریت ءَ را ترندی ءَ چہ بند کنگ بہ بیت ءُ فلسطین ءَ دائمی امن ءِ برجائی ءَ را دل یکیمی کنگ بہ بیت۔ اے فلوٹیلا ءِ سرا 44 ملکانی 450 ءَ چہ گیش کمکی کارندہ سوار بوتگ انت کہ آ اسرائیل ءِ اُرد ءَ ناجائزیں وڑے ءَ دزگیر کتگ انت۔ مزن وزیر ءَ گوشت کہ اے بے وسیں کارکن آنی یکیں جرم بے وس ءُ مظلوم فلسطینی اُلس ءَ را کمک ءِ سر کنگ اِنت۔ آئی ءَ گوشت کہ پاکستان اے درستیں کارکن آنی زوت ءُ بے شرطیں یلو کنگ ءُ فلسطینی آں کمک آنی بے رکاوٹ سر کنگ ءِ لوٹ ءَ کنت۔