خیبر پختونخوا ءَ سرمایہ کاری ءِ مزنیں موہ است انت، معیشت استحکام ءِ نیمگ ءَ روگ ءَ انت، ملکی ءُ درملکی سرمایہ کار پاکستان ءِ سر ءَ بھروسہ کنگ ءَ انت، ادارُکی صدر سید یوسف رضا گیلانی ءَ پاکستان بزنس سمٹ ءَ گوں تران

پشاور ۔2اکتوبر  (اے پی پی): ادارُکی صدر سید یوسف رضا گیلانی ءَ گوشت کہ خیبر پختونخوا ءَ سرمایہ کاری ءِ سک باز موہ است انت، معیشت استحکام ءِ نیمگ ءَ روگ ءَ انت، نوکیں موہ دیم ءَ آیگ ءَ انت ءُ ملکی ءُ درملکی سرمایہ کار پاکستان ءِ سر ءَ بھروسہ کنگ ءَ انت۔ پنچ شمبے ءِ روچ ءَ صدر گس ءِ پریس ونگ ءِ نیمگ ءَ جاڑی بوتگیں بیان ءِ رد ءَ ادارُکی صدر   سید  یوسف رضا گیلانی ءَ اے ھیالانی درشانی پشاور ءَ برجم داشتگیں پاکستان بزنس سمٹ ءَ گوں تران کنان ءَ کت۔ ادارُکی صدر سید یوسف رضا گیلانی ءَ گوشت کہ خیبر پختونخوا ءَ کاروبار ءُ سرمایہ کاری ءِ واستہ مزنیں گنجائش است انت۔ آئی ءَ دل یکیمی ءِ درشان کت کہ سروک دیوان ءِ برجم دارگ پاکستان ءِ اقتصادی دیمروئی ءُ وشھالی ءَ را دیم ءَ برگ ءِ راہ ءُ در آنی شوھازگ ءِ واستہ کنگ بیت۔ یوسف رضا گلیرانی ءَ گوشت کہ پاکستان ءِ معیشت استحکام ءِ نیمگ ءَ روگ ءَ انت ایشی ءِ تہ ءَ بیپاری ءُ سرمایہ کاری ءِ واستہ نوکیں موہ پیداک انت۔ آئی ءَ گوشت کہ ملکی ءُ درملکی سرمایہ کار دوئیں پاکستان ءَ سرمایہ کاری کنگ ءِ واستہ دل یکیمی ءِ درشان کنگ ءَ انت چیاکہ حکومت کاروبار ءِ واستہ ایمن ءُ سازگاریں چاگرد جوڑ کنگ ءِ واستہ کوشست برجاہ انت۔ آئی ءَ اے گپ ءِ سر ءَ زور پر دات کہ پاکستان ءِ ورنا آنی آبادی کہ ملک ءِ کلیں آبادی ءِ تہ ءَ 60درسد ءِ کساس ءَ اِنت ایشی ءِ مستریں توان اِنت۔ آئی ءَ گوشت کہ ورنا آناں بااختیار جوڑ کنگ ءُ آھاں وتی توانائی ءِ درشان کنگ ءَ کمک کنگ وشھالیں آیوکیں وھد ءِ واستہ سک باز المی اِنت۔ ادارُکی صدر یوسف رضا گیلانی ءَ سیل ءُ سواد ءِ ارزشت ءِ سر ءَ ھم زور پر دات ءُ یات کت کہ آئی ءَ وتی وزیر جان سلامتی ءِ بستار ءَ خطہ ءَ سیل ءُ سواد ءِ دیمروئی ءِ واستہ ملام جبہ چیئر لفٹ جوڑ کتگ۔ ناشرکاری ءُ انتہا پسندی ءِ ھلاپ ءَ پاکستان ءِ جنگ ءِ بابت ءَ گپ ءُ تران کنان ءَ ادارُکی صدر ءَ گوشت کہ وھدے گپ ءُ تران ناکام بوت گڈا حکومت ءَ را مھکمیں گامگیج زورگ ءَ ابید دگہ راہ نیست۔ وھدیکہ ما ناشرکاری ءُ انتہا پسندی ءِ ھلاپ ءَ اوشتاتگ آں گڈا پوری دانا ہر وھد ءَ پاکستان ءِ گوما اوشتاتگ۔ آئی ءَ گیش گوشت کہ میاں اوستمانی براتی ءِ کمک ءَ ابید 90 روچ ءِ تہ ءَ 2.5ملین ءَ چہ گیش اندری بے لوگ بوتگیں مردم سوبمندیں رنگ ءَ آباد کنگ بوتگ اَنت کہ اے یک وشیں انسانی کمک ءِ کوشست بوتگ کہ ایشی ءَ را جھان ءِ تک ءَ ستا کرزگ بوتگ۔ یوسف رضا گیلانی ءَ وتی زاتی آزمائش ءِ ھم ھال داتگ کہ آئی ءِ زھگ ءِ ناشرکارانی دست ءَ آوار جنگ ھم ھوار اِنت۔ آئی ءَ گوشت کہ ناشرکاری ءِ ھلاپ ءَ جنگ ءَ پاکستان ءِ نیمگ ءَ وتی الس، سلاھ بندیں اُرد، پولیس، لانس، فرنٹیئر کور ءِ نیمگ ءَ داتگیں قربانی ھچبر شموشگ نہ بنت۔ آئی ءَ یات کت کہ مزن وزیر ءِ بستار ءَ آئی ءَ 14 سالی ملالہ یوسفزئی ءَ را چہ جھان ءِ سنسیشن جوڑ بوھگ ءَ باز پیسر آئی ءَ را وتی کارگس ءَ دعوت داتگ ات ءُ آئی ءَ را آئی ءِ جرات ءُ وانگ ءُ زانگ ءِ ھاترا عزم ءِ ستا ءَ نیشنل پیس ایوارڈ داتگ ات۔ سید  یوسف رضا گیلانی ءَ گوشت کہ پاکستان ءُ اوگانستان جغرافیائی، مذہبی، دود ءُ ربیدگی ءُ تاریخی یکوئی ءَ چہ یکے دومی ءَ گوں بندوک انت۔ آئی ءَ دوئیں ملک آناں ’’جڑواں برات‘‘ لیک اِتگ ءُ گوشت کہ پرامن ءُ مھکمیں اوگانستان پاکستان ءِ جوانیں مفاد ءِ تہ ءَ اِنت۔ آئی ءَ وتی مھکمیں باوست ءِ درشان کت کہ اوگانستان ءِ مٹی کدی ھم پاکستان ءِ ھلاپ ءَ کارمرد کنگ نہ بیت۔ آئی ءَ اوگانستان، چین، روس ءُ ایران ءَ ھوار وتی درستیں ھمساھگیں ملک آنی گوما دوستی ءِ برجائی ءِ واستہ پاکستان ءِ جزم ءِ سر ءَ زور پر دات۔ یوسف رضا گلانی ءَ گوشت کہ پاکستان ءَ مدام خطہ ءَ امن ءُ گپ ءُ تران ءِ کوشست کتگ ۔ ممبئی اُرش ءَ پد استیں جاور ھال آنی ھوالگ ءَ آئی ءَ گوشت کہ پاکستان ءَ سرجمی ءَ کمک ءِ پیشکش کتگ ءُ کشمیر، سچن ءُ ناشرکاری ءِ وڑیں درستیں لگوکیں جیڈھ آناں گیواری ءِ واستہ گپ ءُ تران پدا بندات کنگ ءِ سوج داتگ۔ ادارُکی صدر ءِ مملکت ءَ گوشت کہ راج ءَ وتی ردی ءَ چہ سکین زرتگ ءُ یکوئی ءُ بُزانت ءِ گوما دیم ءَ جنزان اِنت۔ آئی ءَ گوشت کہ پاکستان ءَ گیش ھچ وڑیں ردی ءِ وس ءَ نہ کنت۔ آئی ءَ گوشت کہ ما وتی تجربگ آنی تہ ءَ چہ دربرتگ، نوں مارا امن، برجائی ءُ دیمروئی ءِ بنیات ءَ آیوکیں وھد ءِ جوڑ کنگی اِنت۔ آئی ءَ دل یکیمی ءِ درشان کت کہ پائیدار دمگی امن سرکاری ءُ جندی شعبہ آنی نیام ءَ مھکمیں کمک ءِ گوما پاکستان ءِ معیشت ءَ را مھکم کنگ ءَ کمک رسیت ءُ ایشی ءِ اُلس ءِ واستہ گیش وشھالیں آیوکیں وھد ءِ جوڑ کنگ ءَ کمک رسیت۔ اے موہ ءِ سر ءَ گورنر خیبر پختونخوا فصلے کریم کنڈی، پیپلز پارٹی ءِ مزنیں رہشون ءُ کاروباری برات ءِ باسک ھم ھوار اتنت۔