پاکستان نا اسرائیل نا کنڈآن بلوبل صمود فلوٹیلا ءِ توننگ نا ترندی اٹ مذمت، گام جنیوا کنونشن نا رداٹ خلوک زمواری تا سنگین خلاف ورزی ءِ، ترجمان دفترخارجہ

اسلام آباد۔ 02 اکتوبر(اے پی پی) پاکستان اسرائیل نا کنڈآن گلوبل صمود فلوٹیلا ءِ توننگ نا ترندی اٹ مذمت ءِ کرسا پارینے کہ جہانی کمکی  کارندہ غاتا غیرکانودی دزگیراسرائیل نا کنڈآن جہانی و انسانی کانود نا اسہ پین پاش آن پاش خلاف ورزی اسے ۔ پنچ شنبے نادے آ دفترخارجہ نا کنڈآن جاری بیان نا رداٹ دا فلوٹیلا 40 آن زیات سویلین جہاز آتیا تالان ئس، ہراٹی کم و ود 500 جہانی کمکی کارندہ سوار ئسر ہرا غزہ نا محصور الس اسکان بے کچ المی انسانی امداد سرکننگ کن ہنارہ۔ بیان اٹی پاننگانے کہ جہانی کارندہ غاتا غیرکانودی دزگیری اسرائیل نا کنڈآن جہانی کانود و انسانی کانود نا اسہ پین پاش آن پاش خلاف ورزی اسے، ہرانا سوب بے گناہ شاری تا جونک خطرہ ٹی ءُ۔ دا گام اسرائیل نا جارحانہ پالیسی و غزہ نا غیرکانودی ناکہ بندی نا چرجوئی ءِ، ہرانا سوب اِرا ملین آن زیات فلسطینی الس شدید مشکلات و محرومی تا گواچی ءُ۔ انسانی امداد ءِ توننگ اسرائیل نا کنڈآن چارمیکو جنیوا کنونشن نا رداٹ عائد زمواری تا سنگین خلاف ورزی ءِ ، بیان اٹی پاننگانے کہ پاکستان اسہ وار ولدا خواست کیک کہ مقبوضہ فلسطینی علاقہ غاتیٹی دمدستی، بے شڑت و آخبتی جنگ بندی کننگے، غزہ نا غیرکانودی ناکہ بندی ءِ چٹفنگے، فلسطینی الس اسکان انسانی امداد نا بے روک ٹوک فراوانی ءِ پک کننگے، فلوٹیلا غا سُوار غٹ بندغ آتے انسانی ہمدردی نا رداٹ دمدستی یلہ کننگے و اسرائیل ءِ جہانی کانود نا خلاف ورزی تیا جوابدہ کننگے۔ پاکستان دا عزم انا درشانی ءِ کرے کہ او فلسطینی الس نا انصاف اٹ جہد نا پبی مخ تفی ءِ برجاتخک تانکہ او تینا ناقابلِ تنسیخ حقِ خودارادیت ءِ دوئی کننگ کیر و 1967 آن مست انا سیم تیا جوڑ اسہ آجو، وتواجہ و متصل فلسطینی ریاست اس جوڑ مرے، ہرانا دارالحکومت القدس الشریف مرے۔