حب، آرسی ڈی ہائی وے آ ترند رفتاری نا سوب کوچ و ٹرک اسے نا خوفناک ڈوک لگنگ آن 7 بندغ زوال، 16 ٹھپی

حب۔ 02 اکتوبر(اے پی پی) ضلع لسبیلہ نا تحصیل اوتھل مین آرسی ڈی ہائی وے زیروپوائنٹ نا خڑک ترند رفتاری نا سوب کوچ و ٹرک اسے ٹی خوفناک ڈوک لگنگ آن 7 بندغ زوال ، 16 ٹھپی مسنو۔ سرجم حوال آتا رداٹ ضلع لسبیلہ نا تحصیل اوتھل مین آرسی ڈی ہائی وے زیروپوائنٹ نا خڑک تدوک آنیامی نن کوچ و ٹرک اسے نا نیام اٹ ترند رفتاری نا سوب خوفناک تصادم مس ہراٹی زالبول و چناتتون اوار 7 بندغ زوال وخت اس کہ زالبول و چناتتون اوار 16مسافر بھاز ٹھپی مسنو ۔ شکست نا حوال ملنگ تون ڈی ایس پی اوتھل حاصل خان قمبرانی ، ایس ایچ او اوتھل جان محمد، ایڈیشنل ایس ایچ او شاہد اقبال ریسکیو 1122 ایدھی و لسبیلہ ویلفیئر ٹرسٹ انا منشاکارآک دمدستی وڑاٹ شکست نا جاگہ غا رسینگار۔ ڈسٹرکٹ سپورٹ منیجر پی پی ایچ آئی حاجی خان، انچارج ایدھی بلوچستان ڈاکٹر عبدالحکیم لاسی و انچارج لسبیلہ ویلفیئر ٹرسٹ عرفان رمضان جاموٹ ایمبولینس و ریسکیو ٹیم تا کماشی ءِ کرسا کمکی کارروائی تیٹی بشخ ہلکر۔ لاش و ٹھپی تے دمدستی وڑاٹ ڈسٹرکٹ ہیڈکوارٹر ہسپتال اوتھل آ گدریفنگا ہراڑے میڈیکل سپرنٹنڈنٹ ڈاکٹر عمران خان نا کماشی ٹی میڈیکل ٹیم ٹھپی مروک آتے وخت آ طبی امداد فراوان کرے بھاز ٹھپی مروک آتے پین درمان کن کراچی سول ہسپتال آ گدریفنگا وخت اس کہ اوفتے ٹی ہفت زوال کروک آ بندغ آتا لاش آتے المی پولیس کارروائی آن پد ایدھی ایمبولینس نا کمک اٹ ایدھی سردخانہ سہراب گوٹھ کراچی آ گدریفنگانے، شکست نا حوال آ ڈپٹی کمشنر لسبیلہ گودی حمیرا بلوچ ہم دمدستی وڑاٹ ڈی ایچ کیو ہسپتال اوتھل آ سرمس و ٹھپی تے فراوان کروک آ طبی آسراتی تا جاچ ءِ ہلک ۔