وزیراعظم شہباز شریف نا آزاد کشمیر نا حالیت آتا نوٹس، ویل انا پرامن ایسری کن مذاکراتی کمیٹی ٹی ودکی، کانود نافذ کروک آ ادارہ غاتے مچی کروک آتون تحمل اٹ پیش بننگ نا پارت

لندن۔ 02 اکتوبر (اے پی پی) وزیراعظم محمد شہباز شریف آزاد کشمیر نا حالیت آتیا گڑتی نا درشانی ءِ کرسا کانود نافذ کروک آ ادارہ غاتے مچی کروک آتون تحمل اٹ پیش بننگ و ہروڑنا بے گرج سختی آن پاناد کننگ نا پارت کرینے و حکومتی کہول آ ویل انا پرامن ایسری کن مذاکراتی کمیٹی ٹی ودکی کرینے و سینیٹر راناثناء اللہ ، بنجائی وزیر سردار یوسف، احسن اقبال، مسکوہی صدر آزاد کشمیر مسعود خان و پیپلزپارٹی ناراہشون قمرزمان کائرہ ءِ کمیٹی ٹی اوار کرینے۔ وزیراعظم آفس نا میڈیا ونگ انا کنڈآن پنچ شنبے نادے آ جاری بیان نا رداٹ وزیراعظم محمد شہباز شریف آزاد کشمیر نا حالیت آتا سخت نوٹس ءِ ہلسا ہموجاگہ نا شاری تیان پُرامن مننگ نا خواست کرے۔ وزیراعظم مظاہرہ غاتیٹی مروک آ ناخوشگوار واقعہ غاتا شفاف جاست وپاست نا پرمان کرے۔ وزیراعظم برانزی مچی کروک آتیان زہمی خاہوت آتسکان دمدستی امداد سرکننگ نا ہم پارت کرے۔ بیان نا رداٹ حکومتی کہول آ ویل انا پرامن ایسری کن مذاکراتی کمیٹی ٹی سینیٹر رانا ثناء اللہ ، بنجائی وزیر سردار یوسف، احسن اقبال، مسکوہی صدر آزاد کشمیر مسعود خان و پیپلزپارٹی نا راہشون قمرزما ن کائرہ ءِ اوار کننگانے۔ داکان بیدس وزیراعظم مذاکراتی کمیٹی ءِ دمدستی وڑاٹ مظفرآباد آ ہِننگ و ویل آتا دمدستی ایسری اس کشنگ نا پارت کرے۔ وزیراعظم ایکشن کمیٹی نا باسک و سرکڑدہ غاتیان خواست کرے کہ او حکومتی مذاکراتی کمیٹی تون کمک کیر۔ کمیٹی تینا سلاہ و سوج و سلاہ ئی ایسری ءِ بلاتاخیر وزیراعظم آفس آ گدریفک تانکہ ویل آتا دمدستی توننگ کن گام گیج کننگ مرے ۔ وزیراعظم وطن آ پدی بننگ آ مذاکرات نا عمل نا تینٹ چاروکی ءِ کننگ نا پڑو کرے۔