وزیراعظم محمد شہباز شریف نا ’’صمودغزہ فلوٹیلا‘‘ غا اسرائیلی فوج انا لغور انگا جلہو نا مذمت، غٹ کمکی کارندہ غاتا دمدستی و بے شڑت آن رہائی نا خواست

اسلام آباد۔ 02 اکتوبر (اے پی پی) وزیراعظم محمد شہباز شریف ’’صمود غزہ فلوٹیلا‘‘ غا اسرائیلی فوج انا لغور انگا جلہو نا ترندی اٹ مذمت ءِ کرسا غٹ کمکی کارندہ غاتا دمدستی و بے شڑت آن رہائی و فلسطینی تسکان امداد نا بے سلنگ آن فراوانی نا خواست کرینے۔ ’’ایکس‘‘ آ تینا کلہو اٹی وزیراعظم پارے کہ اسرائیلی بربریت ءِ دمدستی وڑاٹ توننگ و فلسطین اٹ پائیدار امن ءِ پک کننگ وخت انا غٹ آن بھلا خواست ءِ۔ دا فلوٹیلاٹی 44 ملک آتا 450 آن زیات کمکی کارندہ سوار ئسر، ہرافتے اسرائیلی فوج غیرکانودی وڑاٹ دزگیرکرینے۔ وزیراعظم پارے کہ دا بے لوث کارندہ غاتا اسٹ انگا ڈوہ بے کس و مظلوم فلسطینی الس کن امداد دننگ ناءِ۔ اوپارے کہ پاکستان دا غٹ کارندہ غاتا دمدستی و بیدس شڑت آن رہائی و فلسطینی تسکان امداد نا بے سلنگ آن فراوانی نا خواست کیک۔