ایتھوپیا ءِ سفیر ڈاکٹر جمال بکر عبداللہ ءَ گوں ادارُکی صدر سید یوسف رضا گیلانی ءَ گند ءُ نند کتگ

اسلام آباد۔1اکتوبر  (اے پی پی): ایتھوپیا ءِ سفیر ڈاکٹر جمال بکر عبداللہ ءَ گوں ادارُکی صدر سید یوسف رضا گیلانی ءَ گوں ایوان ءِ صدر ءَ گند ءُ نند کت۔ صدارتی ایوان ءِ پریس ونگ ءِ نیمگ ءَ جاڑی بوتگیں بیان ءِ رد ءَ ادارُکی صدر ءَ پاکستان ءُ ایتھوپیا ءِ سیادی ءَ را دیمروئی ءُ مھکم کنگ ءِ تہ ءَ سفیر ءِ کوشست آناں ساڑاتگ ءُ گوشت کہ ایتھوپیا ءِ سفیر ءَ سیاسی، اقتصادی ءُ راجی دو برات ءِ نیام ءَ دیمروئی ءِ تہ ءَ کلیدی کرد پیلو کتگ۔ آئی ءَ سبز پاکستان ءِ گامگیج ءِ تہ ءَ ڈاکٹر جمال بکر عبداللہ ءِ کمک ءُ موسمی بدلی ءِ ھلاپ ءَ جنگ ءِ تہ ءَ آئی ءِ سرگرمیں کرد ءِ ھم ساڑات۔ ادارُکی صدر ءِ مملکت ءَ سفیر ءِ واستہ نیکیں واھشت ءِ درشان کنان ءَ اے یقین ءِ درشان کت کہ آیوکیں سال آنی تہ ءَ پاکستان ءُ ایتھوپیا ءِ سیادی گیش مھکم بنت۔ آئی ءَ ایتھوپیا ءِ پارلیمنٹ ءِ دوئیں ایوان آنی اسپیکر آناں آیوکیں ماہ ءَ اسلام آباد ءَ برجم دارگ بوھوکیں بین پارلیمانی اسپیکر کانفرنس ءَ بھر زوری ءِ دعوت نامہ ھم دات۔ سفیر ڈاکٹر جمال بکر عبداللہ ءَ ادارُکی صدر سید یوسف رضا گیلانی ءِ سروکی کرد ءِ توسیپ کنان ءَ گوشت کہ ایتھوپیا ءَ ھوار سرجمیں افریقی دمگ افریقی ملک آنی گوما سیادی ءَ را دیمروئی دیگ ءِ واستہ پاکستان ءِ کرد ءَ را من ایت۔ آئی ءَ گوشت کہ پاکستان افریقی براعظم ءِ واستہ یک ھاسیں ملکے، ایتھوپیا پاکستان ءِ گوما وتی سیادی ءَ را سک باز ارزشت دنت۔ سفیر ءَ گوشت کہ افریقی دمگ پاکستان ءَ را یک مخلص ءُ براتی ملک لیک ایت، ایتھوپیا ءَ را پاکستان ءِ گوما سیادی ءَ را اولیت دیگ ءِ تہ ءَ سید یوسف رضا گیلانی ءِ کوشست آناں مدام یات بیت۔ آئی ءَ پارلیمانی سفارتکاری ءِ وسیلگ ءَ مردم آنی نیام ءَ رابطہ آناں دیمروئی دیگ ءِ واستہ ادارُکی صدر ءِ فعالیں کرد ءَ را ھم ساڑات۔ ڈاکٹر جمال بکر عبداللہ ءَ پاکستان ءِ سینیٹ ءَ افریقہ ءِ روچ ءِ مراگش ءُ اے موہ ءِ سر ءَ منظور بوتگیں قرارداد ءِ یات ءَ اے مراگش ءَ را یک سنگ میل ءِ نام داتگ کہ افریقہ ءِ درستیں ملک مدام یات کن اَنت۔ آئی ءَ گوشت کہ پاکستان جھان ءِ تک ءَ گیش ءَ چہ گیش ھاسیں کرد پیلو کنت۔ آئی ءَ دل یکیمی دات کہ ایتھوپیا اے سفر ءَ پاکستان ءِ شریک مانیت۔ سفیر ءَ گوشت کہ پاکستان مدام منی دل ءِ نزیک ءَ مان ایت ءُ اسلام آباد ءَ نندگ ءِ وھد ءَ دوستی ءُ مہمان داری ءَ را یات کنت۔ آئی ءَ گوشت کہ آ کانفرنس ءِ واستہ ایتھوپیا ءِ پارلیمانی سروکی ءَ را ذاتی رنگ ءَ دعوت نامہ سر کنت۔